ویب ڈیسک: عالمی مالیاتی منڈیوں میں غیر یقینی صورتحال کے باعث قیمتی دھاتوں پر دباؤ بڑھ گیا ہے، جس کے نتیجے میں سونے کی قیمتوں میں نمایاں کمی دیکھنے میں آئی ہے۔
جمعہ کے روز عالمی منڈی میں سونے کی قیمت مسلسل چوتھے سیشن میں گراوٹ کا شکار رہی اور 0.6 فیصد کمی کے ساتھ 4,619 ڈالر فی اونس پر آ گئی، جو 6 مئی کے بعد کم ترین سطح ہے۔ ہفتہ وار بنیاد پر بھی سونا تقریباً 2 فیصد سستا ہو چکا ہے، جبکہ امریکی گولڈ فیوچرز 1.3 فیصد کمی کے ساتھ 4,624 ڈالر پر بند ہوئے۔
ادھر ڈالر کی قدر میں ایک فیصد سے زائد اضافے نے سونے کو دیگر کرنسی رکھنے والے سرمایہ کاروں کے لیے مزید مہنگا بنا دیا، جس سے طلب میں کمی آئی۔ ماہرین کے مطابق تیل کی بڑھتی قیمتوں نے مہنگائی کے خدشات کو دوبارہ ہوا دی ہے، جس کے باعث بانڈ ییلڈز اور ڈالر مضبوط ہوئے اور سونے پر دباؤ بڑھ گیا۔
امریکی 10 سالہ ٹریژری بانڈ ییلڈ تقریباً ایک سال کی بلند ترین سطح کے قریب پہنچ گئی ہے، جس سے سونا رکھنے کی لاگت بڑھ گئی کیونکہ یہ منافع نہ دینے والا اثاثہ سمجھا جاتا ہے۔ دوسری جانب برینٹ خام تیل کی قیمتیں اس ہفتے 5.6 فیصد اضافے کے ساتھ 106 ڈالر فی بیرل سے اوپر رہیں، جس کی ایک بڑی وجہ ایران سے متعلق کشیدگی اور آبنائے ہرمز کی صورتحال ہے۔
فروری کے آخر سے جاری امریکا اور ایران کے درمیان تناؤ کے بعد سونے کی قیمتوں میں مجموعی طور پر تقریباً 13 فیصد کمی ریکارڈ کی جا چکی ہے۔ حالیہ مہنگائی رپورٹس سے بھی ظاہر ہوا ہے کہ توانائی کی بڑھتی قیمتیں دیگر اشیا اور خدمات کو متاثر کر سکتی ہیں، جس سے امریکا میں جلد شرح سود میں کمی کی توقعات مزید کمزور ہو گئی ہیں۔
اگرچہ سونا روایتی طور پر مہنگائی کے خلاف محفوظ سرمایہ کاری سمجھا جاتا ہے، لیکن بلند شرح سود اس کی کشش کو کم کر دیتی ہے۔ عالمی سیاسی منظرنامے میں ڈونلڈ ٹرمپ اور شی جن پنگ کے درمیان ممکنہ رابطوں پر بھی سرمایہ کاروں کی نظر ہے، جبکہ ایران کے حوالے سے امریکی مؤقف مزید سخت ہوتا دکھائی دے رہا ہے۔
دیگر قیمتی دھاتیں بھی دباؤ میں رہیں، جہاں چاندی 2.5 فیصد کمی کے ساتھ 81.41 ڈالر، پلاٹینم 1.7 فیصد کمی کے ساتھ 2,020 ڈالر اور پیلیڈیم 0.8 فیصد کمی کے ساتھ 1,425 ڈالر فی اونس تک گر گیا۔