ویب ڈیسک: پاکستان میں موبائل صارفین کو عیدالفطر سے قبل فائیو جی سروس کی سہولت ملنے کا امکان ظاہر کیا جا رہا ہے۔

 فائیو جی اسپیکٹرم کی نیلامی کے بعد  پت ٹی اے نے لائسنس جاری کرنے کے عمل کو تیز کر دیا ہے۔

پی ٹی اے حکام کے مطابق فائیو جی لائسنس پہلے ہی تیار کیے جا چکے ہیں اور ٹیلی کام کمپنیوں کو ہدایت کی گئی ہے کہ وہ لائسنس کے حصول کے لیے تمام قانونی تقاضے مکمل کریں تاکہ سروس جلد شروع کی جا سکے۔

ذرائع کے مطابق لائسنس حاصل کرنے سے قبل کمپنیوں کو 15 ملین ڈالر کی بینک گارنٹی جمع کروانا لازمی ہوگی۔ بتایا گیا ہے کہ ایک کمپنی بینک گارنٹی جمع کرا چکی ہے جبکہ دیگر دو کمپنیوں کی جانب سے بھی جلد یہ شرط پوری کیے جانے کی توقع ہے۔

پی ٹی اے اس بات پر بھی غور کر رہا ہے کہ تینوں ٹیلی کام کمپنیوں کو بیک وقت لائسنس جاری کیے جائیں.

حکام کا کہنا ہے کہ تمام کمپنیاں فائیو جی سروس کے فوری آغاز کے لیے تیار ہیں۔ لائسنس کے اجرا کے موقع پر پی ٹی اے ہیڈکوارٹر میں ایک خصوصی تقریب کے انعقاد کی تجویز بھی زیر غور ہے۔