سٹی42: چینی ای کامرس پلیٹ فارم JD.com نے سونے سے ملمع شدہ آئی فون کورز کی ایک خصوصی سیریز متعارف کراتے ہوئے اعلان کیا ہے کہ مخصوص گولڈ کیس خریدنے والے صارف کو نیا iPhone 17 Max مفت دیا جائے گا۔

“Au99.99 Gold” کے نام سے پیش کی گئی اس محدود ایڈیشن سیریز میں کورز 10 گرام سے 100 گرام وزن تک دستیاب ہیں۔ 100 گرام سونے والا کور 139,999 یوان (تقریباً 20 ہزار امریکی ڈالر) میں فروخت کیا جا رہا ہے، اور اسی ورژن کی خریداری پر کمپنی کی جانب سے آئی فون 17 میکس مفت فراہم کرنے کی پیشکش کی گئی ہے۔

رپورٹس کے مطابق کم وزن والے کچھ کورز فروخت ہو چکے ہیں، جبکہ 30 گرام اور 10 گرام کے ورژنز کی تصاویر سوشل میڈیا پر بھی شیئر کی گئی ہیں۔ تاہم کمپنی نے یہ واضح نہیں کیا کہ آیا سب سے مہنگا 100 گرام والا کور فروخت ہوا ہے یا نہیں۔

ماہرین کے مطابق سونے کی تہہ بعض اوقات وائرلیس چارجنگ کے عمل میں رکاوٹ بن سکتی ہے اور اس سے فون کے گرم ہونے کا خدشہ بھی پیدا ہو سکتا ہے، جسے خریداروں کو مدنظر رکھنا چاہیے۔