سٹی 42 : پنجاب میں قومی انسداد پولیو مہم کا آغاز 15 دسمبر سے ہو گا، یہ مہم 30 دسمبر تک جاری رہے گی۔
وزیر صحت و آبادی خواجہ عمران نذیر کی زیر صدارت صوبائی ٹاسک فورس برائے انسداد پولیو کا آن لائن اجلاس ہوا، جس میں چیف سیکرٹری پنجاب زاہد اختر زمان، فوکل پرسن وزیر اعلیٰ پنجاب برائے پولیو عظمیٰ کاردار، ڈپٹی کمشنرز، داخلہ،صحت، تعلیم کے محکموں کے سیکرٹریز، پولیو کے خاتمے کیلئے کام کرنے والے عالمی نمائندوں نے شرکت کی۔
خواجہ عمران نذیر کی جانب سے انسداد پولیو کے اہداف کی کامیابی پر تمام افسران بشمول کمشنرز، ڈپٹی کمشنرز، سی ای اوز ہیلتھ اور پولیو ٹیمز کو شاباشی دی گئی۔ اسکے علاوہ اجلاس میں 15 دسمبر سے شروع ہونے والی انسداد پولیو مہم کے انتظامات کا جائزہ لیا گیا۔
خواجہ عمران نذیر نے متعلقہ حکام کو پولیو ٹیموں کو مکمل سیکیورٹی فراہم کرنے کی ہدایات کیں، کہا کہ وائرس کا پھیلاؤ روکنے کیلئے ہر بچے کو ویکسئن کے قطرے پلا نا ناگزیر ہے۔ انہوں نے کہا کہ مسڈ چلڈرن کی کوریج پر خصوصی توجہ دی جائے۔
چیف سیکرٹری کی جانب سے انسداد پولیو مہم کو موثر اور کامیاب بنانے کی ہدایت کی گئی، کہا کہ بین الصوبائی اور ٹرانزٹ پوائنٹس پر موبائل آبادیوں کی ویکسینیشن کیلئے خصوصی ٹیمیں تشکیل دی جائیں۔ خواجہ عمران نذیر نے کہا کہ انسداد پولیو مہم میں خامیاں دور کر کے وائرس کا خاتمہ ممکن بنایا جا سکتا ہے۔
سربراہ انسداد پولیو پروگرام پنجاب عدیل تصور نے اجلاس کو تفصیلی بریفنگ دی، کہا کہ انسداد پولیو مہم کے دوران 23۔ 3 ملین سے زائد بچوں کو ویکسئن کے قطرے پلائیں جائیں گے۔ انہوں نے بتایا کہ مہم میں دو لاکھ سے زائد پولیو ورکرز خدمات سر انجام دیں گے۔