ویب ڈیسک :نوجوانوں کے عالمی دن کے موقع پر اپنے پیغام میں وزیراعظم شہباز شریف نے کہا ہے کہ پاکستان کی نوجوان آبادی عزم و ہمت اور بہادری کی مثال ہے، ہماری نوجوان آبادی ملکی معاشی ترقی میں بنیادی پہیے کی حیثیت رکھتی ہے۔

نوجوانوں کے عالمی دن کے موقع پر اپنے پیغام میں وزیراعظم شہباز شریف کا کہنا تھا کہ دنیا بھر بالخصوص پاکستان کی نوجوان آبادی کو خراج تحسین پیش کرتے ہیں، پاکستان کی نوجوان آبادی عزم و ہمت اور بہادری کی مثال ہے، ہماری نوجوان آبادی ملکی معاشی ترقی میں بنیادی پہیے کی حیثیت رکھتی ہے۔

انہوں نے کہا کہ رواں سال یہ دن مقامی نوجوان آبادی کیلئے مستحکم ترقیاتی اہداف کے تناظر میں منایا جا رہا ہے، نوجوان قومی اورعالمی افق پر ملک کا نام روشن کرتے ہیں، نوجوان مقامی سطح پر بھی معیشت میں اپنا تعمیری کردار ادا کر رہے ہیں۔

شہباز شریف کا کہنا تھا کہ نوجوانوں کی تعلیم، ہنرمندی، پیشہ ورانہ استعداد میں اضافے کیلئے پالیسیاں بنا رہے ہیں، قومی مصنوعی ذہانت پالیسی 2025 نوجوانوں کو ٹیکنالوجی کے استعمال میں مدد دے گی، قومی یوتھ سکل ڈویلپمنٹ پروگرام کامیابی سے لاکھوں نوجوانوں کی ہنرمندی میں اضافہ کر رہا ہے۔

وزیراعظم نے کہا کہ نوجوانوں کی کاروباری اور کاشتکاری کی صلاحیتوں کے استعمال کیلئے آسان قرضے دینا شروع کئے، حکومت نے اڑان پاکستان کے تحت کمیونٹی سطح پر نوجوانوں کیلئے پلیٹ فارمز کا اہتمام کیا ہے۔