ویب ڈیسک: : ڈی آئی جی ٹریفک مظہر نواز شیخ نے رمضان المبارک اور عیدالفطر سے قبل ٹریفک اہلکاروں کی چھٹیاں منسوخ کرنے کا باقاعدہ حکم نامہ جاری کر دیا ہے تاکہ شہر میں ٹریفک کی روانی کو یقینی بنایا جا سکے۔
ڈی آئی جی ٹریفک مظہر نواز شیخ کی جانب سے جاری کردہ احکامات کے مطابق رمضان المبارک کے دوران خصوصاً افطار سے قبل سڑکوں پر ٹریفک کے دباؤ میں نمایاں اضافہ ہوتا ہے، جس کے پیش نظر اہلکاروں کی مکمل نفری تعینات کرنا ضروری ہے۔
انہوں نے ہدایت کی کہ افطار کے اوقات سے پہلے اہم شاہراہوں، چوراہوں اور تجارتی مراکز کے اطراف ٹریفک اہلکاروں کی موجودگی کو یقینی بنایا جائے تاکہ شہریوں کو مشکلات کا سامنا نہ کرنا پڑے۔
ڈی آئی جی ٹریفک کا کہنا تھا کہ رمضان کے آخری عشرے میں شاپنگ سینٹرز اور بازاروں کے باہر گاڑیوں کی پارکنگ اور رش میں اضافہ ہو جاتا ہے، جسے کنٹرول کرنے کے لیے اضافی نفری درکار ہوگی۔
احکامات کے مطابق ایمرجنسی صورتحال کے علاوہ کسی بھی اہلکار کو چھٹی نہیں دی جائے گی اور جاری کردہ ہدایات پر سختی سے عمل درآمد یقینی بنایا جائے گا۔