سید احمد:لاہورشہر کی مختلف مارکیٹوں، بازاروں، چین سٹورز اور گراسری سٹورز کے تاجروں نے عید کے موقع پر ممکنہ لاک ڈاؤن میں نرمی کا مطالبہ کر دیا ہے۔

تاجروں کا کہنا ہے کہ عید کے دنوں میں کاروباری سرگرمیوں میں نمایاں اضافہ ہوتا ہے اور یہ وقت سال کی سب سے بڑی سیل کا ہوتا ہے، اس لیے حکومت کو چاہیے کہ مارکیٹوں کو 24 گھنٹے کھولنے کی اجازت دی جائے تاکہ تجارتی سرگرمیاں بہتر ہو سکیں۔

شاہد نذیر نے مؤقف اختیار کیا کہ عید کے دوران اگر دکانیں 24 گھنٹے کھلی رہیں تو نہ صرف کاروبار میں بہتری آئے گی بلکہ معیشت کو بھی فائدہ ہوگا۔

 چیئرمین ریٹیل چین رانا طارق محبوب نے کہا کہ عید کے موقع پر تاجروں کو اچھی سیل کی توقع ہوتی ہے اور اس دوران کاروبار کو محدود کرنے کے بجائے کھلا رکھنے کی ضرورت ہے۔ ان کے مطابق تجارتی سرگرمیوں میں نرمی سے مارکیٹ کا ماحول بہتر اور معیشت کو سہارا ملتا ہے۔

تاجروں نے یہ بھی نشاندہی کی کہ گراسری سٹورز اور سپر مارکیٹس سے شہری بنیادی اشیائے خوردونوش خریدتے ہیں، اس لیے ان کی مسلسل دستیابی عوام کے لیے بھی ضروری ہے۔

 لاہور سپر مارکیٹ  کے جنرل سیکرٹری نے کہا کہ عید کے دنوں میں عوام کی بڑی تعداد ضروری اشیا خریدنے کے لیے مارکیٹوں کا رخ کرتی ہے، اس لیے دکانوں کے کھلے رہنے سے شہریوں کو سہولت ملتی ہے۔

تاجر نمائندوں نے حکومت سے اپیل کی ہے کہ عید کے موقع پر مارکیٹوں کو کھلا رکھنے کی اجازت دی جائے تاکہ کاروباری سرگرمیاں متاثر نہ ہوں اور عوام کو بھی خریداری میں آسانی رہے۔