ویب ڈیسک: عالمی منڈی میں قیمتی دھاتوں پر دباؤ برقرار، سونا مزید سستا ہوگیا جبکہ تیل کی قیمتوں میں اضافہ دیکھنے میں آیا ہے۔ خطے میں بڑھتی ہوئی جغرافیائی کشیدگی اور امریکی مالیاتی پالیسی سے متعلق خدشات نے سرمایہ کاروں کو محتاط بنا دیا، جس کے باعث عالمی مارکیٹ میں اتار چڑھاؤ جاری ہے۔
جمعرات کے روز عالمی مارکیٹ میں اسپاٹ گولڈ کی قیمت میں 0.4 فیصد کمی ریکارڈ کی گئی، جس کے بعد یہ 4,060.46 ڈالر فی اونس پر آگئی۔ یہ قیمت گزشتہ روز ریکارڈ ہونے والی ایک ہفتے کی کم ترین سطح کے قریب رہی، جبکہ امریکی گولڈ فیوچر (اگست ڈیلیوری) بھی 0.3 فیصد کمی کے بعد 4,069.80 ڈالر فی اونس پر ٹریڈ کرتا رہا۔
ادھر امریکی فوج نے اعلان کیا کہ آبنائے ہرمز میں بحری آمدورفت کے تحفظ کے لیے ایران پر نئے حملے کیے گئے ہیں۔ اس کے بعد ایران کی جانب سے کویت اور بحرین پر حملوں کی اطلاعات بھی سامنے آئیں، جس سے مشرق وسطیٰ میں کشیدگی مزید بڑھ گئی۔ بڑھتے ہوئے تنازع کے باعث جنگ بندی کی کوششوں پر بھی منفی اثرات مرتب ہونے کا خدشہ ظاہر کیا جا رہا ہے، جبکہ اسی صورتحال کے نتیجے میں عالمی منڈی میں خام تیل کی قیمتوں میں بھی مزید اضافہ دیکھا گیا۔
ماہرین کے مطابق تیل کی بڑھتی ہوئی قیمتیں مہنگائی کے خدشات میں اضافہ کر رہی ہیں، جس کے باعث شرح سود طویل عرصے تک بلند رہنے کے امکانات بھی مضبوط ہوئے ہیں۔ سی ایم ای فیڈ واچ ٹول کے مطابق ستمبر میں امریکی شرح سود میں اضافے کا امکان 68 فیصد جبکہ جنوری 2027 تک اس امکان کو 87 فیصد تک دیکھا جا رہا ہے۔
دوسری جانب بینک آف امریکہ نے 2026 کے لیے سونے کی اوسط قیمت کی پیش گوئی میں 14 فیصد کمی کرتے ہوئے اسے 4,360 ڈالر فی اونس مقرر کر دیا ہے۔ بینک نے اس نظرثانی کی وجہ امریکی مالیاتی پالیسی کے مزید سخت ہونے کے امکانات کو قرار دیا۔
دیگر قیمتی دھاتوں میں بھی ملا جلا رجحان دیکھنے میں آیا۔ چاندی کی قیمت 0.9 فیصد کمی کے بعد 57.77 ڈالر فی اونس رہی، جبکہ پلاٹینم 0.8 فیصد اضافے سے 1,591.13 ڈالر فی اونس اور پیلیڈیم بھی 0.8 فیصد اضافے کے ساتھ 1,223.95 ڈالر فی اونس تک پہنچ گیا۔