صوبائی دارالحکومت سمیت پنجاب بھر میں پٹواریوں کی ہڑتال کا خطرہ ٹل گیا ہے جبکہ دیگر اضلاع میں جاری ہڑتال 28 روز بعد ختم کر دی گئی ہے۔

ذرائع کے مطابق انجمن پٹواریان نے اپنی ہڑتال 28 جون تک موخر کرنے کا اعلان کیا ہے۔ یہ فیصلہ سینئر ممبر بورڈ آف ریونیو ( ایس ایم بی آر) کے ساتھ ہونے والے مذاکرات کے بعد کیا گیا۔

ذرائع کا کہنا ہے کہ ایس ایم بی آر نے پٹواریوں کے مطالبات پر مثبت ردعمل دیا جس کے بعد ہڑتال موخر کرنے کا فیصلہ کیا گیا۔

انجمن پٹواریان نے آئندہ کے لائحہ عمل کے تعین کے لیے 28 جون کو اجلاس طلب کر لیا ہے۔ اجلاس میں مطالبات پر ہونے والی پیش رفت کا جائزہ لیا جائے گا اور مستقبل کی حکمت عملی طے کی جائے گی۔

واضح رہے کہ پٹواری سکیل اپ گریڈیشن اور دیگر مطالبات کی منظوری کے لیے ہڑتال پر تھے۔