وب ڈیسک: فیڈرل بورڈ آف ریونیو  نے پیٹرولیم سیکٹر کی مالی رپورٹنگ کے نظام میں اہم تبدیلی کرتے ہوئے آئل مارکیٹنگ کمپنیوں کیلئے لیوی رپورٹنگ کا نیا طریقہ کار نافذ کر دیا ہے۔

تفصیلات کے مطابق ایف بی آر کی جانب سے سیلز ٹیکس رولز 2006 میں ترمیم کا نوٹیفکیشن جاری کیا گیا ہے، جس کے تحت پیٹرولیم لیوی کی تفصیلات کو ماہانہ سیلز ٹیکس ریٹرنز میں شامل کرنا لازمی قرار دیا گیا ہے۔

نئے نظام کے مطابق آئل مارکیٹنگ کمپنیاں اب اپنی سیلز ٹیکس ریٹرنز میں پیٹرولیم لیوی اور دیگر متعلقہ چارجز کی تفصیلات الگ سے ظاہر کرنے کی پابند ہوں گی۔ اس میں پیٹرولیم ڈویلپمنٹ لیوی اور کلائمیٹ سپورٹ لیوی سے متعلق معلومات بھی شامل ہوں گی۔

ایف بی آر کے مطابق اس ترمیم کا بنیادی مقصد پیٹرولیم لیوی کو سیلز ٹیکس سسٹم کے ساتھ مکمل طور پر منسلک کرنا ہے تاکہ حکومت کو محصولات کی وصولی میں شفافیت اور مؤثریت حاصل ہو سکے۔

مزید بتایا گیا ہے کہ ایف بی آر اب پیٹرولیم اور کلائمیٹ سپورٹ لیوی کی وصولی میں پیٹرولیم ڈویژن کے ایجنٹ کے طور پر کردار ادا کرے گا، جس سے نگرانی اور ریکارڈ مینجمنٹ کا نظام مزید بہتر ہو جائے گا۔

نئے نظام سے نہ صرف مالیاتی شفافیت میں اضافہ متوقع ہے بلکہ ٹیکس اکٹھا کرنے کے عمل کو بھی زیادہ مؤثر اور منظم بنانے میں مدد ملے گی۔