ویب ڈیسک : معروف میڈیا اسٹریٹیجسٹ عاصم صدیق نے سافٹ ویئر انجینئرنگ میں پی ایچ ڈی مکمل کرلی۔

 صحافی محمد عاصم صدیق  نے بین الاقوامی سطح پر معتبر جامعہ یونیورسٹی آف ٹیکنالوجی ملائیشیا (UTM) سے سافٹ ویئر انجینئرنگ میں پی ایچ ڈی کی ڈگری حاصل کرلی ہے۔ یہ یونیورسٹی دنیا کی 200 بہترین جامعات میں شامل ہے۔

 ڈاکٹر عاصم صدیق کی تحقیق کا محور ریگریشن ٹیسٹنگ اور سافٹ ویئر ٹیسٹنگ رہا، جو جدید سافٹ ویئر سسٹمز، خصوصاً مصنوعی ذہانت (AI) کے ابھرتے ہوئے میدان میں ان کی قابل اعتماد کارکردگی یقینی بنانے کے لیے نہایت اہم شعبے ہیں۔

 انہوں نے دورانِ تحقیق دو تحقیقی مقالے شائع کیے، جبکہ دو مزید مقالے اشاعت کے مرحلے میں ہیں۔ یہ کام سافٹ ویئر کوالٹی ایشورنس کے عالمی مباحثے میں ایک بامعنی اضافہ ہے۔

 2021 سے 2025 کے دوران اپنے پی ایچ ڈی کے عرصے میں وہ طلبہ کی قیادت میں بھی سرگرم رہے۔ وہ UTM میں انٹرنیشنل سٹوڈنٹس سوسائٹی کے صدر اور انٹرنیشنل سٹوڈنٹس سوسائٹی پاکستان کے صدر بھی رہے، جہاں انہوں نے متنوع طلبہ برادریوں کے مابین علمی اور ثقافتی روابط کے فروغ میں اہم کردار ادا کیا۔

 میڈیا انڈسٹری میں عاصم صدیق کئی اہم اداروں میں کلیدی مناصب پر خدمات انجام دے چکے ہیں ۔  انہوں نے ڈیجیٹل مواد، ڈیٹا پر مبنی حکمت عملی، اور پلیٹ فارم گروتھ کے میدان میں اپنی جدید سوچ سے پہچان حاصل کی۔