سٹی42: صوبائی وزیر اطلاعات عظمیٰ بخاری نے کہا ہے کہ پنجاب بھر میں بسنت کی تیاریاں زور و شور سے جاری ہیں اور حکومت عوام کو محفوظ اور خوشگوار تفریح فراہم کرنے کے لیے بھرپور اقدامات کر رہی ہے۔
پنجاب اسمبلی کے احاطے میں گفتگو کرتے ہوئے عظمیٰ بخاری نے بتایا کہ وزیراعلیٰ مریم نواز خود بسنت کے حوالے سے حفاظتی اقدامات اور ایس او پیز پر عوام کو آگاہ کریں گی۔ ان کا کہنا تھا کہ لاہور کے ہر کونے میں ٹرانسپورٹ کی سہولت فراہم کی جا رہی ہے جبکہ اندرون شہر میں سروے کے بعد خستہ حال عمارتوں کو سیل کر دیا گیا ہے۔
صوبائی وزیر اطلاعات نے کہا کہ پتنگوں کی قیمتوں میں اضافے کی شکایات پر مزید چار اضلاع میں پتنگ سازی کی اجازت دی گئی ہے تاکہ طلب و رسد کا فرق ختم کیا جا سکے۔ ان کے مطابق بسنت کا سامان جلد سستا ہو جائے گا اور شہری خوشی خوشی تہوار منا سکیں گے۔
عظمیٰ بخاری نے بتایا کہ اگر اس بار بسنت کامیابی سے منائی گئی تو اگلے سال پورے پنجاب میں بسنت منانے کا منصوبہ بنایا جائے گا۔ انہوں نے کہا کہ بسنت سے 8 سے 10 صنعتوں کو روزگار ملا ہے جبکہ گزشتہ دو دنوں میں 34 کروڑ روپے کی پتنگیں فروخت ہو چکی ہیں۔
انہوں نے مزید کہا کہ حکومت کا مقصد ثقافتی سرگرمیوں کو فروغ دینا اور ساتھ ہی شہریوں کی جان و مال کا تحفظ یقینی بنانا ہے۔