سٹی42: پنجاب حکومت نے رمضان المبارک سے قبل رجسٹرڈ ورکرز کے لیے "رمضان نگہبان پیکج" کے تحت ریلیف فراہم کرنے کے لیے عملدرآمد تیز کر دیا ہے۔ محکمہ سوشل سیکیورٹی کے تحت رجسٹرڈ محنت کشوں کو مریم نواز راشن کارڈ کے ذریعے ماہ رمضان میں نقد سبسڈی اور مستقل ماہانہ سبسڈی دی جائے گی۔ اس مقصد کے لیے 12 لاکھ سے زائد رجسٹرڈ ورکرز میں راشن کارڈ تقسیم کرنے کا ہدف مقرر کیا گیا ہے، جبکہ پورے صوبے میں 22 ڈائریکٹوریٹس کے ذریعے اس عمل کی سخت مانیٹرنگ کی جا رہی ہے۔
پنجاب (اسلام آباد) — رمضان المبارک سے قبل پنجاب حکومت نے محکمہ سوشل سیکیورٹی کے ذریعے رجسٹرڈ ورکرز کے لیے بڑا ریلیف پیکیج جاری کر دیا ہے۔ وزیراعلیٰ پنجاب مریم نواز کے "رمضان نگہبان پیکج" پر عملدرآمد تیز کر دیا گیا ہے جس کے تحت رجسٹرڈ محنت کشوں کو ماہ رمضان میں مالی معاونت فراہم کی جائے گی۔
محکمہ سوشل سیکیورٹی کے مطابق مریم نواز راشن کارڈ کے ذریعے ہر رجسٹرڈ ورکر کو ماہ رمضان میں 10 ہزار روپے تک کی سبسڈی نقد فراہم کی جائے گی، جبکہ مستقل بنیادوں پر 3 ہزار روپے ماہانہ کی سبسڈی بھی دی جائے گی۔
اس سلسلے میں 12 لاکھ سے زائد رجسٹرڈ ورکرز میں راشن کارڈ کی تقسیم کا ہدف مقرر کیا گیا ہے اور پورے پنجاب میں 22 ڈائریکٹوریٹس کے ذریعے راشن کارڈ کی تقسیم کی سخت مانیٹرنگ جاری ہے۔
محکمہ نے کہا ہے کہ ورکرز کے بائیومیٹرک تصدیقی عمل اور فراہم کی جانے والی سہولیات کا روزانہ جائزہ لیا جا رہا ہے، جبکہ رمضان سے قبل زیادہ سے زیادہ محنت کشوں کو راشن کارڈ فراہم کرنے کی ہدایت بھی جاری ہے۔
وزیراعلیٰ مریم نواز کی ہدایت پر محنت کشوں کو فوری ریلیف دینے کے لیے تمام افسران الرٹ رہیں گے، اور شفافیت و بروقت ادائیگی کو اولین ترجیح قرار دیا گیا ہے۔