علی ساہی :وزیراعلیٰ پنجاب کے احکامات پر صوبہ بھر میں ڈرائیونگ لائسنس کے اجرا کا عمل تیزی سے جاری ہے، جس کے نتیجے میں ڈرائیونگ لائسنس کے اجرا میں ریکارڈ اضافہ دیکھنے میں آیا ہے۔

ترجمان ٹریفک پولیس کے مطابق جنوری 2026 کے دوران 12 لاکھ 41 ہزار سے زائد ڈرائیونگ لائسنس جاری کیے گئے۔

ترجمان کے مطابق اس عرصے میں 4 لاکھ 40 ہزار سے زائد شہریوں نے لرننگ لائسنس بنوائے، جبکہ 4 لاکھ شہریوں کو ریگولر ڈرائیونگ لائسنس جاری کیے گئے۔ اسی طرح 3 لاکھ 90 ہزار شہریوں نے لرننگ، ریگولر اور انٹرنیشنل ڈرائیونگ لائسنس کی تجدید کروائی۔

اعداد و شمار کے مطابق 2500 سے زائد شہریوں نے گم شدہ ڈرائیونگ لائسنس دوبارہ حاصل کیے، جبکہ 4500 سے زائد شہریوں کو انٹرنیشنل ڈرائیونگ پرمٹ بھی جاری کیے گئے۔

ڈی آئی جی ٹریفک پنجاب محمد وقاص نذیر نے اس موقع پر واضح کیا کہ بغیر ڈرائیونگ لائسنس گاڑی چلانا جرم ہے اور بغیر لائسنس ڈرائیورز کو بھاری جرمانوں اور سخت قانونی کارروائی کا سامنا کرنا پڑ سکتا ہے۔ انہوں نے مزید کہا کہ ای ڈرائیونگ لائسنس کی قانونی حیثیت ڈرائیونگ لائسنس کارڈ کے برابر ہے اور شہری اس سہولت سے بھرپور فائدہ اٹھائیں۔

ٹریفک پولیس کے مطابق لائسنسنگ کے نظام میں بہتری کا مقصد نہ صرف شہریوں کو سہولت فراہم کرنا ہے بلکہ ٹریفک قوانین پر عملدرآمد اور سڑکوں کو محفوظ بنانا بھی ہے۔