سٹی42: وفاقی حکومت نے ملک بھر کے صنعتی زونز کو مرحلہ وار طور پر نجی شعبے کے سپرد کرنے کا بڑا فیصلہ کر لیا ہے۔
ذرائع کے مطابق فیصلے کے تحت صنعتی زونز میں بجلی کی فراہمی، بلنگ اور ریکوری کے تمام معاملات اب پرائیویٹ سیکٹر کے ذمہ ہوں گے۔ اگرچہ صنعتی صارفین کو بجلی کے بل لیسکو (LESCO) جاری کرے گی تاہم ان کی ریکوری پرائیویٹ انڈسٹریل زون انتظامیہ کرے گی۔
مزید بتایا گیا ہے کہ اکنامک زونز اور انڈسٹریل اسٹیٹس میں نئے بجلی کے کنکشن جاری کرنے کا اختیار بھی نجی شعبے کو دے دیا جائے گا۔ پرائیویٹ ایجنٹ کنکشن نصب کرنے کے بعد لیسکو کو مطلع کرے گا تاکہ اسے بلنگ سسٹم میں شامل کیا جا سکے۔
اس نئے نظام کے تحت لیسکو اور دیگر ڈسٹری بیوشن کمپنیاں پرائیویٹ سیکٹر کو بلک سپلائی کی بنیاد پر بجلی فراہم کریں گی، جس کے لیے آپریشنز اینڈ مینٹی ننس (O&M) ایگریمنٹ کا ماڈل متعارف کرایا جائے گا۔
ذرائع کے مطابق بجلی کی تقسیم کار کمپنیوں نے O&M ایگریمنٹ کے لیے نیپرا میں باقاعدہ درخواستیں جمع کرا دی ہیں۔ نیپرا نے اس معاملے پر تمام اسٹیک ہولڈرز سے 15 روز میں تجاویز طلب کر لی ہیں۔