علی ساہی:محکمہ ایکسائز، ٹیکسیشن اینڈ نارکوٹکس کنٹرول پنجاب نے ٹوکن ٹیکس اور دیگر ٹیکسوں کی وصولی کے لیے صوبہ بھر میں سخت کارروائیوں کا فیصلہ کر لیا ہے۔ ڈی جی ایکسائز عمر شیر چٹھہ نے ہدایت کی ہے کہ ٹوکن ٹیکس نادہندگان فوری طور پر واجبات ادا کریں، بصورت دیگر ان پر 100 فیصد جرمانہ عائد کیا جائے گا۔
ڈی جی ایکسائز کے مطابق مالی سال کے آخری مہینے میں ٹوکن ٹیکس نادہندگان کے خلاف خصوصی مہم چلائی جائے گی، جس کے تحت ٹیکس ادا نہ کرنے والی گاڑیوں کو بند کیا جائے گا جبکہ نان رجسٹرڈ گاڑیوں کے خلاف بھی پنجاب بھر میں کارروائی عمل میں لائی جائے گی۔
عمر شیر چٹھہ نے بتایا کہ محکمہ ایکسائز نے رواں مالی سال کے پہلے 11 ماہ کے دوران ریکارڈ 70 ارب روپے کی وصولیاں کی ہیں، جو گزشتہ مالی سال کی مجموعی وصولیوں سے 15 ارب روپے زیادہ ہیں۔
انہوں نے مزید بتایا کہ مجموعی وصولیوں میں سے 40 ارب روپے موٹر ٹیکس جبکہ 25 ارب روپے پراپرٹی ٹیکس کی مد میں وصول کیے گئے ہیں۔
ڈی جی ایکسائز نے پراپرٹی ٹیکس نادہندگان کے خلاف بھی سخت اقدامات کی ہدایت کرتے ہوئے کمرشل پراپرٹیز کو سربمہر کرنے کا حکم دیا ہے۔ گھریلو پراپرٹی مالکان کو واجبات کی عدم ادائیگی پر لینڈ ریونیو ایکٹ کے تحت قرقی کے نوٹسز جاری کرنے کی بھی ہدایت کی گئی ہے۔
محکمہ ایکسائز نے پروفیشنل ٹیکس اور ایکسائز ڈیوٹی کی مد میں بھی وصولیوں کو یقینی بنانے کے لیے فیلڈ افسران کو کارروائیاں مزید سخت کرنے کی ہدایت جاری کر دی ہے۔