سٹی42: محکمہ ہاؤسنگ اور سینٹر آف ایکسیلینس ان واٹر ریسورسز انجینئرنگ (CEWRE) کے درمیان اہم امور پر مفاہمتی یادداشت (MoU) پر دستخط کر دیے گئے ہیں۔ یہ معاہدہ یونیورسٹی آف انجنیئرنگ اینڈ ٹیکنالوجی لاہور میں منعقدہ تقریب میں سیکرٹری ہاؤسنگ اور ڈائریکٹر CEWRE نے کیا۔

معاہدے کے تحت طلباء کو فیلڈ ٹریننگز، انٹرنشپ پروگرامز اور ریسرچ میں معاونت فراہم کی جائے گی جبکہ محکمہ ہاؤسنگ کے زیر انتظام اداروں کے افسران اور عملے کی استعداد کار بڑھائی جا سکے گی۔ اس معاہدے کے ذریعے وا سا ایجنسیز، پبلک ہیلتھ انجینئرنگ کے افسران، الجزاری واٹر اینڈ سینی ٹیشن اکیڈمی کے اہلکار اور دیگر متعلقہ اسٹاف جدید تعلیم اور تحقیق سے مستفید ہو سکیں گے۔ افسران اعلیٰ تعلیم اور ریسرچ کے لیے CEWRE کی سہولتوں سے فائدہ اُٹھائیں گے۔

سیکرٹری ہاؤسنگ نے کہا کہ نوجوان طلباء جدید آئیڈیاز متعارف کروانے میں اہم کردار ادا کرتے ہیں اور وسائل کی بچت کے لیے تعمیراتی کاموں میں جدید انجینئرنگ حل متعارف کروائے جائیں گے۔ ڈائریکٹر CEWRE نے اس اقدام کو خوش آئند قرار دیتے ہوئے کہا کہ یہ معاہدہ طلباء اور افسران دونوں کے لیے فائدہ مند ثابت ہوگا۔طلباء نے بھی یقین دہانی کرائی کہ فیلڈ میں عملی تجربے سے ان کے پروفیشنل کیریئر میں یقینی طور پر مدد ملے گی۔