ویب ڈیسک: پاکستان پیپلز پارٹی کے چیئرمین بلاول بھٹو زرداری نے سندھ میں خواتین کے لیے پنک ٹیکسی سکیم کا اعلان کردیا۔
پاکستان پیپلز پارٹی کے چیئرمین بلاول بھٹو زرداری نے کہا ہے کہ سندھ حکومت بہت جلد خواتین کے لیے نئی پنک ٹیکسی سکیم کا آغاز کرے گی، جس کا مقصد خواتین کو محفوظ اور بااعتماد سفری سہولت فراہم کرنا ہے۔
بلاول بھٹو نے کراچی میں خواتین میں مفت الیکٹرک پنک سکوٹروں کی چابیاں تقسیم کرنے کے بعد تقریب سے خطاب کرتے ہوئے کہا کہ یہ صرف آغاز ہے، ہم بہت جلد خواتین کے لیے پنک ٹیکسی سکیم بھی متعارف کروائیں گے، تاکہ وہ زیادہ محفوظ اور سہل سفر کر سکیں۔
انہوں نے کہا کہ سندھ حکومت اس سے قبل الیکٹرک بسیں اور کراچی میں پنک بس سروس بھی شروع کر چکی ہے، جس کی وجہ سے سندھ خواتین کے لیے مخصوص پبلک ٹرانسپورٹ فراہم کرنے والا پہلا صوبہ بن گیا ہے،سکوٹر سکیم خاص طور پر طالبات اور ملازمت پیشہ خواتین کے سفری مسائل کو کم کرنے کے لیے متعارف کرائی گئی ہے، تاکہ وہ اپنے تعلیمی اور پیشہ ورانہ سفر کو آسان بنا سکیں۔

بلاول بھٹو زرداری نے کہا کہ خواتین کو بااختیار بنانا سندھ حکومت کے ترقیاتی ایجنڈے کا اہم حصہ ہے، کیونکہ پاکستان کسی بھی شعبے میں حقیقی ترقی اس وقت تک حاصل نہیں کر سکتا جب تک خواتین کی فعال شمولیت کو یقینی نہ بنایا جائے۔