ویب ڈیسک: ورلڈ لبرٹی فنانشل (ڈبلیو ایل ایف)، جو کہ امریکی صدر ڈونلڈ ٹرمپ کی حمایت یافتہ ڈی سنٹرلائزڈ فنانس (ڈی ای ایف آئی) پلیٹ فارم ہے، نے ہفتہ کے روز پاکستان کرپٹو کونسل (پی سی سی) کے ساتھ ایک تاریخی مفاہمتی یادداشت (ایل او آئی) پر دستخط کیے ہیں۔

 اس معاہدے کا مقصد پاکستان میں بلاک چین جدت، اسٹیبل کوائن اپنانے اور ڈی سنٹرلائزڈ فنانس (ڈی فائی) کے انضمام کو تیز کرنا ہے، ڈبلیو ایل ایف کے وفد میں زکری فولک مین، زکری وٹکوف (جو کہ مشرق وسطیٰ کے لیے امریکی خصوصی ایلچی اسٹیو وٹکوف کے بیٹے ہیں)، اور چیز ہیرو شامل تھے۔

پاکستان کے فعال اور مثبت انداز نے یہ ظاہر کر دیا ہے کہ ملک مالیاتی جدت کی نئی لہر کو اپنانے کے لیے پُرعزم ہے، حکومت نے جلد ہی کرپٹو کرنسی کی جامع قانونی حیثیت کے حوالے سے پالیسیاں متعارف کرانے کا عندیہ دیا ہے، جس سے پاکستان کی دنیا کی تیزی سے ابھرتی ہوئی کرپٹو مارکیٹوں میں پوزیشن مزید مضبوط ہوگی۔

مفاہمتی یادداشت پر دستخط ورلڈ لبرٹی فنانشل اور پاکستان کرپٹو کونسل کے اجلاس کے دوران کیے گئے، اس ملاقات میں پاکستان کے وزیر خزانہ، کرپٹو کونسل کے سی ای او، گورنر اسٹیٹ بینک آف پاکستان، چیئرمین ایس ای سی پی اور وفاقی سیکرٹری برائے آئی ٹی بھی موجود تھے۔

پاکستان کرپٹو کونسل اور ورلڈ لبرٹی فنانشل کے درمیان تعاون کا دائرہ کار اہم شعبوں پر مشتمل ہے، جن میں ’بلاک چین مالیاتی مصنوعات کی جانچ کے لیے ریگولیٹری سینڈ باکسز کا آغاز‘ ’ڈی فائی پروٹوکولز کی ذمہ دارانہ ترقی کو فروغ دینا‘ ’ رئیل اسٹیٹ اور کموڈیٹیز جیسی حقیقی دنیا کی اثاثوں کی ٹوکنائزیشن کا جائزہ لینا‘ ’رقوم کی منتقلی اور تجارت کے لیے اسٹیبل کوائن ایپلی کیشنز کو وسعت دینا‘ ’بلاک چین انفراسٹرکچر اور عالمی ریگولیٹری رجحانات پر اسٹریٹجک مشاورت فراہم کرنا شامل ہے۔

پاکستان کے وزیر خزانہ محمد اورنگزیب نے کہا کہ پاکستان کے نوجوان اور ٹیکنالوجی سیکٹر ہماری سب سے بڑی طاقت ہیں۔ اس طرح کی شراکت داریوں کے ذریعے ہم سرمایہ کاری، جدت اور بلاک چین معیشت میں عالمی قیادت کے نئے دروازے کھول رہے ہیں۔

پاکستان کرپٹو کونسل کے سی ای او بلال بن ثاقب نے کہا کہ ورلڈ لبرٹی فنانشل کے ساتھ ہمارا اشتراک صرف ایک شراکت داری نہیں بلکہ ایک اسٹریٹجک قدم ہے، جس کا مقصد ہماری نوجوان آبادی کو بااختیار بنانا اور پاکستان کو عالمی مالیاتی مستقبل میں شامل کرنا ہے۔