جمال الدین: مزنگ کے علاقے میں پولیو ٹیم پر حملے کے مقدمے میں اہم پیشرفت سامنے آئی ہے، عدالت نے تینوں ملزمان کو ضمانت پر رہا کرنے کا حکم دے دیا ہے۔

پولیس کے مطابق ملزمان عبد الرحمان خان، حاجی سلم خان اور عظیم خالد خان کو گرفتار کرکے ماڈل ٹاؤن کچہری میں پیش کیا گیا۔ ملزمان پر پولیو ورکر عامر اور اس کے ساتھی پر حملہ کرنے کا الزام تھا۔

پولیس نے عدالت سے ملزمان کے جسمانی ریمانڈ کی استدعا کی، تاہم سماعت کے دوران ملزمان کی جانب سے وکیل عطہر یاسمین ایڈووکیٹ نے دلائل دیے۔

عدالت نے دلائل سننے کے بعد مقدمے سے دفعہ 506 (جان سے مارنے کی دھمکی) خارج کردی اور تینوں ملزمان کو ضمانت پر رہا کرنے کا حکم جاری کردیا۔

سماعت جوڈیشل مجسٹریٹ ماڈل ٹاؤن کچہری علی اکبر گجر نے کی۔