ویب ڈیسک:بھارت میں ایک افسوسناک واقعے نے توجہ حاصل کر لی جہاں معروف اداکارہ  کرشی تھاپنڈا کے گھر سے ایک کاروباری شخصیت مردہ حالت میں پائی گئی، جس کے بعد پولیس نے معاملے کی تحقیقات کا آغاز کر دیا ہے۔

بھارتی میڈیا رپورٹس کے مطابق کرشی تھاپنڈا کے بنگلورو کے علاقے راج راجیشوری نگر میں واقع اپارٹمنٹ سے 24 جون کی رات 45 سالہ تاجر ویشاک کی لاش ملی۔

پولیس حکام کا کہنا ہے کہ ابتدائی تفتیش کے دوران معلوم ہوا کہ ویشاک ذہنی دباؤ کا سامنا کر رہا تھا اور وہ اداکارہ کے اپارٹمنٹ میں اکثر آتا جاتا تھا۔ واقعے کے وقت اپارٹمنٹ میں وہ اکیلا موجود تھا۔ جائے وقوعہ سے کسی قسم کا خودکشی نوٹ یا ویڈیو پیغام نہیں ملا۔

تحقیقات کے مطابق واقعے سے قبل ویشاک نے اداکارہ سے رابطہ کیا اور مبینہ طور پر اپنی جان لینے کے ارادے کا ذکر کیا۔اطلاع ملتے ہی اداکارہ نے فوری طور پر اس کے اہلِ خانہ کو آگاہ کیا، تاہم جب اہلِ خانہ اپارٹمنٹ پہنچے تو ویشاک جان کی بازی ہار چکا تھا۔

پولیس نے واقعے کی مختلف پہلوؤں سے جانچ شروع کر دی ہے اور مزید حقائق سامنے آنے کے بعد ہی حتمی مؤقف سامنے آنے کا امکان ہے۔