سٹی 42:ایک مشہور کہاوت ہے کہ ’’جو سوتے ہیں وہ کھوتے ہیں‘‘۔ایک نوجوان نے اس کہاوت کو غلط ثابت کردیا ہے۔

زیادہ سونے والے لوگوں کو ٹھیک نہیں سمجھا جاتا ہے،ان کو کاہل اورسست تصور کیا جاتا ہے،چینی نوجوان اس نیند سے فائدہ اٹھا لیا اور سوتے سوتے شہرت کی بلندیوں پر پہنچ گیا۔غیر ملکی خبر رساں ادارے کے مطابق چینی سوشل میڈیا پلیٹ فارم ڈوین پر ایک چینی نوجوان نے کیمرا کھولا اور لائیو ویڈیو اسٹریمنگ آن کرکے اسے اپنے سامنے رکھ کر سو گیا، اس لائیو اسٹریمنگ کو ہزاروں کی تعداد میں لوگوں نے دیکھا۔

یوئنسان نامی نوجوان کا کہنا ہے کہ وہ ایک دن بور ہورہا تھا تو اس نے سوچا کیوں نا وہ لائیو اسٹریمنگ کرتے ہوئے سوئے اور اٹھنے کے بعد دیکھے کہ وہ سوتے ہوئے خراٹے لیتا ہے یا نہیں۔چینی نوجوان جب لائیو اسٹریمنگ آن کرنے  کے بعد سویا اور پھر صبح اٹھا تو وہ حیران ہوگیا کیونکہ اس کی ویڈیو کو ہزاروں کی تعداد میں لوگوں نے دیکھا جب کہ اس کے چینل پر بھی تقریباً 8 لاکھ سے زائد صارفین نے اسے فالو کیا۔

بعد ازاں یوئنسان نے کئی مرتبہ سوتے ہوئے لائیو اسٹریمنگ آن کی اور اس طرح کرنے سے اس کی ویڈیوز وائرل ہوئیں اور نوجوان کی وائرل ویڈیوز کو 18.5 ملین صارفین کی جانب سے دیکھا گیا جس کے بعد اس کے فالوورز کی تعداد لگ بھگ 10 لاکھ کے قریب جاپہنچی۔

شہرت حاصل کرنے والے چینی نوجوان کا کہنا ہے کہ اسے  اندازہ نہیں تھا کہ اتنے لوگ دیکھیں گے، ان تمام لوگوں کا شکریہ ادا کرتا ہوں جنہوں نے مجھے دیکھا لیکن اب میرا دوبارہ سوتے ہوئے لائیو آنے کا کوئی ارادہ نہیں۔