سٹی42: ٹریفک پولیس لاہور اور ریجنل ٹرانسپورٹ اتھارٹی (آر ٹی اے) کی مشترکہ کارروائیوں میں غیر قانونی موٹرسائیکل رکشوں اور لوڈر رکشوں کی باڈی بنانے والی فیکٹریوں اور دکانوں کو سیل کرنے کا عمل شروع کر دیا گیا ہے۔

چیف ٹریفک آفیسر (سی ٹی او) لاہور، ڈاکٹر اطہر وحید کا کہنا ہے کہ "ایسی ٹرانسپورٹ جو انسانی جانوں کے لیے خطرہ ہے، اسے سڑکوں پر آنے کی ہرگز اجازت نہیں دی جا سکتی۔ انہوں نے واضح کیا کہ غیر قانونی رکشوں کی تیاری اور فروخت میں ملوث عناصر کے خلاف آہنی ہاتھوں سے نمٹا جائے گا۔

ڈاکٹر اطہر وحید کے مطابق ٹریفک پولیس لاہور اور آر ٹی اے کی ٹیمیں شہر بھر میں متحرک ہیں اور ایسی تمام فیکٹریوں اور ورکشاپس کی نشاندہی کی جا رہی ہے جو قوانین کی خلاف ورزی کرتے ہوئے غیر معیاری اور غیر رجسٹرڈ رکشے تیار کر رہی ہیں۔