ویب ڈیسک :عالمی شہرت یافتہ گلوکار اور اداکار علی ظفر نے قوم سے معافی مانگتے ہوئے کہا ہے کہ وہ کوشش کریں گے کہ یہ سنگین غلطی دوبارہ نہ دہرائی جائے۔
علی ظفر نے سوشل میڈیا پر جاری اپنے پیغام میں کہا کہ میں قوم سے معافی مانگنا چاہتا ہوں کہ میں نے بغیر بنیان کے کرتا پہنا اور عید کے موقع پر روایتی اجرک اور دھوتی میں پودوں کو پانی دینے کا نہایت سنجیدہ فعل انجام دیا۔
I would like to apologise to the nation for wearing a see through kurta without a banyan, and for the very serious act of watering plants in a traditional Ajrak dhoti on Eid. I understand this has been one of the most pressing national and global issues affecting everyone’s lives…
— Ali Zafar (@AliZafarsays) March 24, 2026
ان کا کہنا تھا کہ میں سمجھتا ہوں کہ یہ حالیہ دنوں میں سب کی زندگیوں پر اثر انداز ہونے والے انتہائی اہم قومی اور عالمی مسئلے میں سے ایک رہا ہے اور میں پوری کوشش کروں گا کہ دوبارہ یہ غلطی نہ دہراؤں۔ اس معاملے پر توجہ دینے کے لیے آپ کا شکریہ۔
واضح رہے کہ علی ظفر نے عید کے موقع پر مختصر ویڈیو شیئر کی تھی جس میں وہ گلابی اور پیچ رنگ کی قمیض کے ساتھ دھوتی پہن کر پودوں کو پانی دیتے ہوئے نظر آئے۔ تاہم ان کا یہ منفرد لباس سوشل میڈیا پر تنقید کی زد میں آگیا۔
اسی دوران دیگر تصاویر میں علی ظفر اپنی اہلیہ کے ساتھ میچنگ سوٹ میں نظر آئے جس پر ایک بار پھر صارفین نے تنقیدی تبصرے کیے۔ بعض نے کہا کہ لباس لڑکیوں کے طرز کے لگ رہا ہے تو کوئی یہ کہتا نظر آیا کہ آپ نے بنیان کیوں نہیں پہنی؟