سٹی42: پنجاب حکومت نے رمضان نگہبان پیکیج 2026 کے مؤثر اور شفاف نفاذ کے لیے 4 ارب روپے کا آپریشنل بجٹ طلب کر لیا ہے، جس کے تحت مستحق خاندانوں کو بروقت ریلیف فراہم کرنے کے لیے تمام انتظامی تیاریوں کو حتمی شکل دی جا رہی ہے۔
ذرائع کے مطابق مجوزہ بجٹ میں سے 3.5 ارب روپے بینک آف پنجاب (BOP) کے ذریعے انتظامی اور مالی امور پر خرچ کیے جائیں گے، جبکہ 50 کروڑ روپے عوامی آگاہی مہم کے لیے مختص کرنے کی سفارش کی گئی ہے۔ حکومت کا ہدف ہے کہ جدید ڈیٹا مینجمنٹ اور شفاف نظام کے ذریعے امداد صرف حقدار افراد تک پہنچے۔
حکام کا کہنا ہے کہ بینک آف پنجاب رمضان نگہبان پیکیج کے تحت خصوصی اے ٹی ایم کارڈز تیار کرے گا جو مستحقین میں تقسیم کیے جائیں گے۔ یہ کارڈ تحصیل سطح پر قائم کیمپس کے ذریعے عوام کو فراہم کیے جائیں گے تاکہ لوگوں کو سہولت کے ساتھ امداد مل سکے۔
واضح رہے کہ پنجاب حکومت رواں سال بھی رمضان نگہبان پیکیج کے تحت 30 ارب روپے تقسیم کرے گی۔