(ویب ڈیسک) آئی ایم ایف کی منیجنگ ڈائریکٹر رسٹیا لینا جارجیوا نے کہا تھا کہ اگر پاکستان ملک کی معیشت بہتر کرنا چاہتا ہے تو اسے یقینی بنانا ہوگا ہے کہ زیادہ آمدنی والے ٹیکس ادا کریں اور سبسڈی صرف غریبوں کو ملے۔
آئی ایم ایف کی انہی شرائط اور سفارشات کو مدنظر رکھتے ہوئے وفاقی حکومت نے بزنس کلاس یا فرسٹ کلاس میں سفر کرنے پر فضائی ٹکٹ پر مزید ٹیکس عائد کردیا۔
تفصیلات کے مطابق پاکستان سے مختلف دوسرے ممالک کی جانب فرسٹ اور بزنس کلاس میں سفر کرنے کیلئے فضائی ٹکٹ پر فیڈریل ایکسائز ڈیوٹی عائد کردی گئی ہے جبکہ اکانوی کلاس میں بیرون ملک سفر کرنے والوں پر فیڈریل ایکسائز ڈیوٹی عائد نہیں ہوگی۔
یاد رہے کہ وفاقی وزیر خزانہ اسحٰق ڈار نے قومی اسمبلی اور سینیٹ دونوں ایوانوں میں فنانس سپلیمنٹری بل 2023ء پیش کیا، جس میں 170 ارب روپے اضافی وصول کرنے کے اقدامات تجویز کیے گئے تاکہ آئی ایم ایف کی آخری پیشگی شرط کو پورا کیا جاسکے۔
آئی ایم ایف نے پاکستان کو تمام اقدامات پر عمل کرنے کیلئے یکم مارچ کی ڈیڈ لائن دی ہے تاہم 115 ارب روپے کے ٹیکس اقدامات کا بڑا حصہ پہلے ہی 14 فروری سے ایس آر اوز کے ذریعے نافذ کیا گیا تھا۔