نور مقدم کی سالگرہ پر بہن کی دلخراش پوسٹ، سوشل میڈیا پر وائرل

Noor Muqada case
Noor Muqadam

ویب ڈیسک: رواں سال جولائی میں اسلام آباد میں قتل کی جانے والی نور مقدم کی بہن سارہ مقدم نے انسٹاگرام پر نور کی سالگرہ کے موقع پر دلخراش پوسٹ شیئر کی ہے۔

سارہ مقدم نے بہن کی 28 ویں سالگرہ کے کیک کی تصویر شیئر کی اور طویل نوٹ بھی پوسٹ کیا۔انہوں نے نور کو مخاطب کرتے ہوئے لکھا کہ کئی مرتبہ بیٹھ کر ایک خصوصی نوٹ لکھنے کا سوچا لیکن لکھنے کیلئے الفاظ جمع نہ کرسکی، میں کبھی سوچ بھی نہیں سکتی تھی کہ تمہیں براہ راست سالگرہ کی مبارکباد دینے کی بجائے یوں نوٹ لکھوں گی۔

سارہ مقدم نے لکھا کہ کاش میں اس مرتبہ بھی ہمیشہ کی طرح تمہیں آدھی رات کو سالگرہ وِش کرکے سرپرائز دیتی اور گلے لگا کر بتاتی کہ میں تم سے کتنی محبت کرتی ہوں، مجھے افسوس ہے کہ ہم اس مرتبہ ایک ساتھ کیک نہیں کاٹ سکتے لیکن میں ہر لمحے تمہاری مغفرت کیلئے دعا کرتی ہوں۔انہوں نے لکھا کہ مجھے یقین نہیں ہوتا کہ ہم ایک دوسرے سے جنوری 2020 سے نہیں ملے اور ہمیں اس برس بھی ملاقات کا موقع نہیں مل سکا۔

نور مقدم کی بہن نے اپنے طویل نوٹ میں مزید لکھا کہ دنیا بدل دینے کی تمہاری خواہش آج رنگ لا رہی ہے، تم یقیناً ایک بہتر مقام سے دیکھ رہی ہوگی کہ کتنے لوگ تمہیں انصاف دلانے کی کوشش کررہے ہیں۔ یاد رہے کہ اسلام آباد کے تھانہ کوہسار کی حدود F7 فور میں 20 جولائی کو 27 سالہ لڑکی نور مقدم کو اس کے دوست ظاہر جعفر نے تیز دھار آلے سے قتل کیا تھا جس کا مقدمہ والد کی مدعیت میں تھانہ کوہسار میں درج ہے، نور مقدم قتل کیس کا مقدمہ سپریم کورٹ میں زیرسماعت ہے۔