شاہد سپرا: شہر کے مختلف علاقوں میں ہونے والی بارش کے باعث لیسکو کا بجلی ترسیلی نظام متاثر ہوگیا، جس کے نتیجے میں 130 سے زائد فیڈرز پر تکنیکی اور فنی خرابیاں پیدا ہو گئیں۔
بارش کے دوران ٹرانسمیشن اور ڈسٹری بیوشن سسٹم پر دباؤ بڑھنے سے متعدد فیڈرز ٹرپ کر گئے، جبکہ کئی علاقوں میں ٹرانسفارمرز جلنے کے واقعات بھی رپورٹ ہوئے۔
لیسکو حکام کے مطابق فیڈرز میں خرابیوں کے باعث شہر کے مختلف علاقوں میں بجلی کی فراہمی عارضی طور پر معطل ہوگئی، جس سے ہزاروں صارفین کو مشکلات کا سامنا کرنا پڑ رہا ہے۔مسلسل بارش نے بحالی کے کاموں میں بھی مشکلات پیدا کر دی ہیں، جس کے باعث لائن اسٹاف کو متاثرہ مقامات تک رسائی اور مرمتی کاموں میں دشواری کا سامنا ہے۔
ترجمان لیسکو کا کہنا ہے کہ بارش کے باعث حفاظتی اقدامات کے تحت بعض مقامات پر بجلی کی سپلائی بھی بند کی گئی، جبکہ متاثرہ فیڈرز کی بحالی کے لیے فیلڈ ٹیمیں متحرک ہیں۔ ٹیمیں خراب فیڈرز، ٹرانسفارمرز اور دیگر تکنیکی مسائل کو دور کرنے کے لیے ہنگامی بنیادوں پر کام کر رہی ہیں۔
حکام نے بتایا کہ تکنیکی خرابیوں کو جلد از جلد دور کرکے مرحلہ وار بجلی کی فراہمی بحال کی جا رہی ہے، جبکہ شہریوں سے اپیل کی گئی ہے کہ خراب موسم کے دوران بجلی کی تنصیبات اور ٹوٹی ہوئی تاروں سے محفوظ فاصلہ رکھیں اور کسی بھی ہنگامی صورتحال کی فوری اطلاع متعلقہ حکام کو دیں۔