علی ساہی  پنجاب پولیس نے شہریوں کو انصاف اور سہولت اُن کی دہلیز پر فراہم کرنے کے لیے ملکی تاریخ کا انقلابی قدم اٹھا لیا ۔

پہلی بار موبائل پولیس اسٹیشن اور لائسنسنگ یونٹ عوامی سہولت کے لیے تیار کر لیا گیا ہے۔

ڈی آئی جی ٹریفک پنجاب وقاص نذیر کے مطابق اب شہری اپنے گھر یا دفتر کے قریب ہی ڈرائیونگ لائسنس بنوا سکیں گے اور مقدمات کا اندراج بھی موقع پر کیا جا سکے گا۔

اُن کا کہنا تھا کہ پنجاب بھر کے لیے 118 موبائل گاڑیاں تیار کی جا رہی ہیں جن میں سے 20 فیصد پنک رنگ کی وینز خواتین کے لیے مخصوص ہوں گی،ابتدائی مرحلے میں 34 موبائل وینز مکمل طور پر تیار کر لی گئی ہیں جن میں چار کاؤنٹرز ڈرائیونگ لائسنس اور ایف آئی آر کے اندراج کے لیے مختص کیے گئے ہیں۔

وقاص نذیر نے مزید بتایا کہ افتتاحی تقریب کے بعد تمام اضلاع میں گاڑیوں کی تقسیم کا عمل شروع کر دیا جائے گا،تاکہ شہریوں کو پولیس خدمات جدت اور تیز رفتاری کے ساتھ اُن کے دروازے پر دستیاب ہوں۔