سٹی 42 : وفاقی وزیر مواصلات عبدالعلیم خان نے مری اسلام آباد ایکسپریس وے کا دورہ و معائینہ کیا، انہوں نے مری ایکسپریس وے کی تزئین و آرائش کے کاموں میں تاخیر پر ناراضگی کا اظہار کیا، عبدالعلیم خان نے مری ایکسپریس وے کیلئے این ایچ اے افسران کو  گرین بیلٹس جلد مکمل کرنے کی ڈیڈ لائن دے دی۔ 

 وزیر مواصلات عبدالعلیم خان نے کہا کہ ایکسپریس وے کے اطراف پودے لگائیں، گرین بیلٹس جلد مکمل کریں۔ انہوں نے خوبصورت لینڈ سکیپ، حفاظتی جنگلوں کی تنصیب اور باقی ماندہ کام کی جلد تکمیل کی ہدایت بھی کی۔ 

 وزیر مواصلات کی مری ایکسپریس وے کیلئے این ایچ اے افسران کو ڈیڈ لائن، مزید مہلت نہیں ملے گی۔ اس موقع پر گفتگو میں انہوں نے کہا کہ اس ایکسپریس وے کی تزئین و آرائش مکمل ہونے پر وزیراعظم کو دعوت دیں گے۔ وفاقی وزیر مواصلات نے ہدایت کی کہ تزئین و آرائش کا کام معیاری اور دیر پا ہونا چاہیے۔ 

عبدالعلیم خان نے ریسٹ ایریاز کا بھی معائنہ کیا، اس موقع پر این ایچ اے افسران کو ہدایت کی کہ مزید واش رومز بنائے جائیں ۔ انہوں نے کہاکہ ایکسپریس وے پر ریسٹ ایریاز کو موٹرویز کی طرز پر آؤٹ سورس کریں ۔ وفاقی وزیر نے ہدایت کی کہ ریسٹ ایریاز میں معیاری کینٹین کو بھی جلد فنکشنل کیا جائے۔ انہوں نے مزید کہا کہ نیشنل ہائی وے اتھارٹی باقی ماندہ کام کی فوری تکمیل یقینی بنائے ۔ 

این ایچ اے حکام نے اس موقع پر بریفنگ میں بتایا کہ نئی لائٹس کی تنصیب مکمل، ریفلیکٹرز لگ گئے ہیں، ایکسپریس وے پر ای ٹیگ کی سہولت کے ساتھ نیا ٹول پلازہ فنکشنل ہو گیا۔ 

مختلف مقامات پر مری جانے والے سیاحوں نے وفاقی وزیر عبدالعلیم خان سے گفتگو کی اور ایکسپریس وے کو خوبصورت بنانے پر اظہارِ تشکر بھی کیا۔ عبدالعلیم خان نے کہا کہ مری آنے والے سیاحوں کے لیے محفوظ اور آرام دہ سفر یقینی بنارہے ہیں۔