فاران یامین: ڈولفن سکواڈ نے شہر بھر میں چوری شدہ اور جعلی نمبر پلیٹ کی حامل موٹرسائیکلوں کے خلاف جاری کریک ڈاؤن کے دوران گزشتہ 24 گھنٹوں میں اہم کامیابیاں حاصل کیں۔

 ترجمان ڈولفن کے مطابق سکواڈ نے مختلف کارروائیوں میں 36 چوری شدہ موٹر سائیکلیں برآمد کیں جن کا ڈیٹا چیک کرنے پر وہ چوری شدہ ثابت ہوئیں۔

ترجمان کے مطابق 12 موٹر سائیکلیں قانونی کارروائی مکمل ہونے پر سپرداری پر اصل مالکان کے حوالے کر دی گئیں، جبکہ 18 موٹرسائیکلوں کے خلاف جعلی نمبر پلیٹس رکھنے پر قانونی کارروائی عمل میں لائی گئی۔

ڈولفن سکواڈ نے شہر کے مختلف مقامات سے برآمد ہونے والی مزید 6 چوری شدہ موٹرسائیکلیں متعلقہ تھانوں کے حوالے کر دیں۔

ایس پی ڈولفن نے شہریوں سے اپیل کی ہے کہ سپرداری پر ریلیز کی گئی اپنی موٹرسائیکلوں کا ریکارڈ فوری طور پر درست کروائیں تاکہ کسی بھی قانونی پیچیدگی سے بچا جا سکے۔