ویب ڈیسک: محکمہ موسمیات پاکستان نے خبردار کیا ہے کہ رمضان کی آمد کے ساتھ ہی ملک کے بیشتر حصوں میں گرم اور خشک موسم کا سامنا ہوگا، خاص طور پر روزوں کے ابتدائی دنوں میں۔
محکمہ موسمیات کے ڈپٹی ڈائریکٹر عرفان ورک کے مطابق رمضان کے پہلے دس دنوں کے دوران بارش کے امکانات نہ ہونے کے برابر ہیں۔ محکمہ کی پیش گوئی کے مطابق دن کے اوقات میں ملک کے بیشتر علاقوں میں موسم خشک رہے گا۔
لاہور اور اسلام آباد جیسے شہروں میں ماہ کے آغاز پر درجہ حرارت 30 ڈگری سینٹی گریڈ سے کم رہنے کی توقع ہے, تاہم ملک کے جنوبی علاقوں میں نمایاں طور پر زیادہ گرمی پڑنے کا امکان ہے۔
ڈپٹی ڈائریکٹر میٹ عاطف ارشاد کے مطابق رمضان کے آغاز میں بارش کا کوئی امکان نہیں، تاہم مطلع جزوی طور پر ابر آلود رہ سکتا ہے۔ ان کا کہنا ہے کہ 26 فروری کو بارش کا امکان موجود ہے جس سے موسم میں معمولی تبدیلی آسکتی ہے۔
سندھ اور جنوبی پنجاب کے بعض علاقوں میں درجہ حرارت تقریباً 35 ڈگری سینٹی گریڈ تک پہنچ سکتا ہے، جس کے باعث ان علاقوں میں روزے کے اوقات مرکزی اور شمالی علاقوں کی نسبت زیادہ دشوار ہو سکتے ہیں۔
جنوبی ساحلی شہر کراچی میں ہلکی بارش کا امکان ظاہر کیا گیا ہے۔ سینئر اہلکار انجم نذیر کے مطابق مغربی ہواؤں کا نیا سلسلہ ملک میں داخل ہونے کی توقع ہے، جو شہر میں ہلکی پھوار کا سبب بن سکتا ہے۔ تاہم ماہرین موسمیات نے خبردار کیا ہے کہ ممکنہ بارش مجموعی طور پر گرم اور خشک موسم کے رجحان میں نمایاں تبدیلی نہیں لائے گی۔
محکمہ موسمیات کے مطابق رمضان کے آخری دس دنوں میں درجہ حرارت میں مزید اضافہ متوقع ہے۔ حکام نے عوام کو مشورہ دیا ہے کہ روزے کے اوقات میں احتیاطی تدابیر اختیار کریں کیونکہ مہینے کے اختتام تک گرمی کی شدت میں اضافے کا امکان ہے۔
انہوں نے مزید بتایا کہ بدھ کی شام رمضان کا چاند نظر آنے کے امکانات ہیں جبکہ یکم رمضان المبارک 19 فروری کو متوقع ہے۔