( ارشاد قریشی)بانی پی ٹی آئی کے جیل میں علاج اور صحت کی ابتدائی رپورٹ ہوم ڈیپارٹمنٹ پنجاب کو بھجوا دی گئی۔
 ذرائع کے مطابق بانی کے بلڈ پریشر، نبض، ٹمپریچراور شوگر کا مکمل چارٹ رپورٹ میں شامل ہے،بانی کی آنکھوں سے متعلق صورت حال کی بھی رپورٹ بھجوائی گئی ہے۔
ذرائع کے مطابق بانی کی رپورٹس،اورمیڈیکل سٹاف کی تفصیلات بھی بھجوائی گئی ہیں،رپورٹ میں یہ تفصیلات بھی شامل ہیں کہ بانی کوکب اور کس ڈاکٹر نے چیک کیا؟رپورٹ کے مطابق آن ڈیوٹی ڈاکٹرز روزانہ 3 مرتبہ بانی کے وائٹل سائنز اور طبی معائنہ کرتے ہیں، روزانہ طبی معائنے اور وائٹل سائنز کا ریکارڈ باقاعدگی سے مرتب کیا جاتا ہے۔
دوسری طرف اڈیالہ جیل کے باہر سیکیوریٹی مزید سخت کردی گئی ہے اورپانچ نمبر گیٹ سے ایک ایمبولینس داخل ہونے کی بھی اطلاع ملی ہے۔
ذرائع کے مطابق بانی پی ٹی آئی کے علاج کے معاملے پرڈاکٹرز کی ٹیم اڈیالہ جیل پہنچ گئی ہے،اڈیالہ جیل کے پانچ نمبر گیٹ سے ایک ایمبولینس اور ڈاکٹرز کی ٹیم داخل ہوئی ہے۔
ڈاکٹر امجد اور ڈاکٹر ندیم قریشی پر مبنی میڈیکل ٹیم بانی پی ٹی آئی کے مکمل طبی معائنے کے بعد بانی کو ہسپتال منتقل کرنے کے حوالے سے فیصلہ کریں گے۔