سٹی 42 : نائب وزیراعظم اسحاق ڈار نے یورپی یونین کے جی ایس پی پلس مانیٹرنگ مشن کی آئندہ پاکستان آمد کیلئے تیاریوں کو حتمی شکل دینے کی ہدایت کردی۔
ترجمان دفتر خارجہ کے مطابق نائب وزیراعظم اسحاق ڈار کی زیر صدارت اعلیٰ سطح بین الوزارتی اجلاس ہوا۔ اجلاس پاکستان کی تجارتی بڑھوتری کی حکمتِ عملی اور معاشی سفارت کاری کے مختلف پہلوؤں کا جائزہ لینے کیلئے منعقد کیا گیا۔ نائب وزیرِ اعظم نے تمام متعلقہ فریقوں کو ہدایت کی کہ یورپی یونین کے جی ایس پی پلس مانیٹرنگ مشن کی آئندہ پاکستان آمد کیلئے تیاریاں حتمی شکل دیں۔
ترجمان دفتر خارجہ کے مطابق اسحاق ڈار نے زور دیا کہ جی ایس پی پلس پاکستان اور یورپی یونین دونوں کیلئے ایک باہمی فائدہ مند فریم ورک ہے۔نائب وزیراعظم نے اعادہ کیا کہ پاکستان کی تجارت اور معاشی سفارت کاری کو مضبوط بنانا ملک کی خارجہ پالیسی کی اہم ترجیح ہے۔
اجلاس میں معاونِ خصوصی طارق باجوہ اور سیکرٹری خارجہ آمنہ بلوچ نے شرکت کی۔ اس کے علاوہ سیکرٹری کامرس، سیکرٹری انسانی حقوق اور متعلقہ وزارتوں کے سینئر حکام بھی اجلاس میں شریک ہوئے۔