ویب ڈیسک: ٹریفک پولیس نے نیشنل اسٹیڈیم میں پاکستان سپر لیگ سیزن 8 کے میچز کے حوالے سے ٹریفک پلان کو حتمی شکل دیدی، میچز کیلئے انتظامات کو حتمی شکل دے دی گئی ہے۔

 ترجمان ٹریفک پولیس کے مطابق نیشنل کوچنگ سینٹر چائنا گراؤنڈ پارکنگ کے حوالے سے کارساز سے آنے والے میڈیا حضرات حبیب ابراہیم رحمت اللہ روڈ، اسٹیڈیم فلائی اوور کے نیچے سے ہوتے ہوئے سر شاہ سلیمان روڈ پر نیشنل کوچنگ سینٹر چائنا گراؤنڈ میں اپنی گاڑی پارک کریں گے۔

    ملینیم مال سے آنے والے میڈیا حضرات اسٹیدیم روڈ (پیر صبغت اللہ شاہ راشدی روڈ) سے ہوتے ہوئے، اسٹیڈیم فلائی اوور کے نیچے سے دائیں جانب سر شاہ سلیمان روڈ پر نیشنل کوچنگ سینٹر چائنا گراؤنڈ میں اپنی گاڑی پارک کریں گے اسی طرح سے نیو ٹاؤن سے آنے والے میڈیا حضرات اسٹیدیم روڈ (پیر صبغت اللہ شاہ راشدی روڈ) سے ہوتے ہوئے آغا خان اسپتال کے بعد بائیں جانب سر شاہ سلیمان روڈ پر نیشنل کوچنگ سینٹر چائنا گراؤنڈ میں اپنی گاڑیاں پارک کریں گے۔

عوام کیلئے پارکنگ انتظامات کے حوالے سے ترجمان ٹریفک پولیس کے مطابق شہر کے مختلف علاقوں سے نیشنل اسٹیڈیم  آنے والے شائقین جن کے پاس میچ کے ٹکٹ ہوںگے ان کیلئے ڈالمیا روڈ غریب نواز فٹبال گراؤنڈ میں پارکنگ کے انتظامات کیے گئے ہیں، پارکنگ کرنے کیلئے اصل شناختی کارڈ و میچ کا ٹکٹ دکھانا لازمی ہوگا جہاں پر شائقین اپنی گاڑی و موٹر سائیکل پارک کر سکیں گے اور جہاں سے بذریعہ شٹل سروس انھیں نیشنل اسٹیڈیم لیجایا جائیگا۔

 ترجمان کے مطابق متبادل روٹ کے سلسلے میں دوران میچ لیاقت آباد 10 نمبر سے حسن اسکوائر پل جانب نیشنل اسٹیڈیم ٹریفک کو جانے کی اجازت نہیں دی جائیگی اسی طرح یونیورسٹی روڈ ایکسپو سینٹر ٹرننگ سے اسٹیڈیم کی جانب جانے والی سڑک ٹریفک کیلئے بند رہیگی جبکہ اسٹیڈیم روڈ سے جانب حسن اسکوائر ٹریفک چلتی رہیگی۔

 ترجمان کے مطابق ہیوی ٹریفک سہراب گوٹھ سے جانب نیپا، لیاقت آباد نمبر 10 سے جانب حسن اسکوائر، پی پی چورنگی سے جانب یونیورسٹی روڈ ، کارساز سے اسٹیڈیم، ملینیم تا نیو ٹاؤن، اسٹیڈیم سگنل تا حسن اسکوائر ہر قسم کی ہیوی ٹریفک کا داخلہ ممنوع ہوگا۔

 ٹریفک پولیس نے عوام الناس سے گزارش کی ہے کہ وہ کسی بھی زحمت و پریشانی سے بچنے کیلئے قانون نافذ کرنے والے اداروں اور ٹریفک پولیس سے تعاون کریں جبکہ شہری اپنی گاڑیوں اور موٹر سائیکلوں کو کسی سروس روڈ یا مین روڈ پر ہرگز پارک نہ کریں بلکہ دیے گئے پارکنگ مقامات پر ہی پارک کریں، شہری کسی بھی پریشانی کی صورت میں رہنمائی حاصل کرنے کیلئے ٹریفک پولیس رہنما 1915 ملائیں۔

دوسری جانب پی ایس ایل 8 کے کراچی میں میچز کیلئے انتظامات کو حتمی شکل دے دی گئی جبکہ پچز کی تیاری کا عمل آخری مراحل میں پہنچ گیا، گھاس کو کاٹ دیا گیا، خیال کیا جارہا ہے کہ پچز بیٹنگ کیلئے مددگار ثابت ہوں گی۔

 شائقین کرکٹ کو چوکوں، چھکوں کی بارش دیکھنے کو ملے گی، گراؤنڈ میں ڈیجیٹل باؤنڈریز لگا دی گئی ہیں، غیر ملکی براڈ کاسٹرز نے اپنی تنصیبات مکمل کرنے کا سلسلہ جاری رکھا، اسٹیڈیم کی تزئین و آرائش کا کام بھی کرلیا گیا۔تماشائیوں کو سہولیات کی فراہمی کیلئے خصوصی انتظامات کیے گئے ہیں، نشستوں کی صفائی کرلی گئی، تماشائیوں کو اشیاء خوردونوش کی فراہمی کیلئے فوڈ اسٹالز لگائے گئے ہیں۔

 ایس ایس یو کے کمانڈوز نے کسی بھی ہنگامی صورتحال سے نمٹنے کیلئے گراؤنڈ میں خصوصی مشق کی، ایونٹ میں شریک تمام ٹیموں اور غیرملکیوں سمیت متعلقہ ذمہ داران کو وی وی آئی پی کا درجہ دے کر خصوصی سیکیورٹی فراہم کی جارہی ہے۔