سٹی42: سالانہ اربوں روپے کی آمدن دینے والے محکمہ ایکسائز اینڈ ٹیکسیشن کو سرکاری دفاتر کی شدید کمی کا سامنا ہے۔ اس مسئلے کے حل کے لیے رائیونڈ میں ریجن بی کے دو منزلہ سرکاری دفتر کا افتتاح کر دیا گیا ہے۔
دفتر کا افتتاح سیکرٹری ایکسائز مسعود مختار اور ڈائریکٹر جنرل ایکسائز عمر شیر چٹھہ نے مشترکہ طور پر کیا۔ اس موقع پر ڈی جی ایکسائز عمر شیر چٹھہ کا کہنا تھا کہ رواں سال 24 کروڑ روپے کے فنڈز سے اس عمارت کو مکمل طور پر فعال کیا جائے گا۔
انہوں نے بتایا کہ ریجن بی میں سینکڑوں ملازمین خدمات انجام دے رہے ہیں تاہم موجودہ جگہ ناکافی ہے، جس کے باعث دفاتر کی توسیع ناگزیر ہو چکی تھی۔ نئے دفتر سے ملازمین کو بہتر سہولیات اور عوام کو بہتر سروس فراہم کی جا سکے گی۔
ڈی جی ایکسائز کے مطابق رواں ماہ کے دوران ریجن اے کی عمارت کا افتتاح بھی ہربنس پورہ میں کیا جائے گا۔ ریجن اے میں تقریباً 500 ملازمین کے لیے تین منزلہ نئی عمارت تعمیر کی جائے گی تاکہ بڑھتے ہوئے انتظامی بوجھ کو مؤثر انداز میں سنبھالا جا سکے۔
عمر شیر چٹھہ نے مزید بتایا کہ صوبے بھر میں 15 ریجنل اور ڈسٹرکٹ دفاتر کے لیے جگہ کے حصول اور تعمیر کے سلسلے میں جلد سمری ارسال کی جائے گی۔ ان کا کہنا تھا کہ سرکاری دفاتر کی تعمیر سے کرائے کی مد میں سالانہ کروڑوں روپے کی بچت ممکن ہو سکے گی، جو کہ قومی خزانے کے لیے ایک اہم فائدہ ہوگا۔