احمد منصور : 45ویں پاکستان آرمی رائفل ایسوسی ایشن سنٹرل میٹ کی اختتامی تقریب کا جہلم میں انعقاد، فیلڈ مارشل سید عاصم منیر نےتقریب میں بطور مہمان خصوصی شرکت کی۔
آئی ایس پی آر کے مطابق مقابلے یکم اکتوبر سے 10 نومبر تک آرمی مارک مین شپ یونٹ جہلم میں جاری رہے، دو ہزار سے زائد شرکا نے مختلف فورسز اور صوبوں کی نمائندگی میں حصہ لیا۔
شرکا نے نشانہ بازی کی بہترین مہارت اور جوش و جذبے کا مظاہرہ کیا، پاکستان آرمی نے تیسری انٹر سروسز کومبیٹ شوٹنگ چیمپئن شپ 2025 جیت لی، پاک فوج نے تمام چاروں انٹر سروسز میچز میں کامیابی حاصل کی،پنجاب رجمنٹ نے یونٹ فائرنگ پروفیشنسی میچ گروپIجیتا۔
سپاہی محمد عرفان، پنجاب رجمنٹ، ’’ماسٹر ایٹ آرمز‘‘ قرار پائے، نائب صوبیدار عمر فاروق، آرمی مارک مین شپ یونٹ، نے ’’آرمی ہنڈریڈ رائفل میچ ٹرافی‘‘ جیت لی۔
فیلڈ مارشل سید عاصم منیر نے شرکا کی نشانہ بازی کی مہارت کو سراہا، فیلڈ مارشل عاصم منیر نے کہا کہ نشانہ بازی میں مہارت، عسکری تربیت کا بنیادی مقصد رہنا چاہیے۔
آئی ایس پی آر کے مطابق فیلڈ مارشل نے ملٹری کالج جہلم کی 100سالہ تقریبات میں بھی بطور مہمان خصوصی شرکت کی، فیلڈ مارشل نے ’’سینٹینری یادگار‘‘ اور ’’کالج میوزیم‘‘ کا افتتاح کیا۔
فیلڈ مارشل عاصم منیر نے کالج کی صدی بھر کی خدمات اور میراث کو خراج تحسین پیش کیا، آرمی چیف نے کالج کے کردار کو نظم و ضبط، قیادت اور حب الوطنی کی تربیت کا مرکز قرار دیا۔
آرمی چیف نے عالمگیریوں کے ملک و فوج کے لیے کردار کو سراہا،فیلڈ مارشل نے یادگار شہدا پر پھول چڑھائے، جہلم آمد پر کور کمانڈر راولپنڈی اور آئی جی ٹریننگ اینڈ ایویلیوایشن نے آرمی چیف کا استقبال کیا۔
