ویب ڈیسک: بالی ووڈ کے سینئر اداکار دھرمیندر کے حوالے سے گردش کرنے والی انتقال کی افواہیں ان کی صاحبزادی عشا دیول نے جھوٹی ثابت کرت ہوئے اپنے انسٹاگرام بیان میں واضح کیا ہے کہ دھرمیندر مستحکم ہیں اور صحت یاب ہو رہے ہیں۔
عشا دیول نے افواہوں پر برہمی کا اظہار کرتے ہوئے کہا کہ میڈیا حد سے زیادہ تیزی دکھا رہا ہے اور غلط خبریں پھیلا رہا ہے۔ میرے والد بالکل ٹھیک ہیں اور صحتیابی کی جانب گامزن ہیں۔ ہم سب سے گزارش کرتے ہیں کہ ہماری پرائیویسی کا خیال رکھا جائے، دعا کرنے والوں کا شکریہ۔
اداکار کی اہلیہ ہیما مالنی نے بھی اپنی ٹوئٹ میں برہمی کا اظہار کیا اور لکھا کہ 'جو کچھ ہو رہا ہے وہ ناقابل معافی ہے! ذمہ دار چینلز ایسے شخص کے بارے میں جھوٹی خبریں کیسے پھیلا سکتے ہیں جس کا علاج ہو رہا ہے اور وہ صحت یاب ہو رہے ہیں؟
What is happening is unforgivable! How can responsible channels spread false news about a person who is responding to treatment and is recovering? This is being extremely disrespectful and irresponsible. Please give due respect to the family and its need for privacy.
— Hema Malini (@dreamgirlhema) November 11, 2025
یاد رہے کہ یہ افواہیں 10 نومبر کی رات اس وقت تیزی سے پھیل گئیں جب سوشل میڈیا پلیٹ فارمز خصوصاً ٹوئٹر (ایکس) پر دھرمیندر کے انتقال سے متعلق غیر مصدقہ خبریں گردش کرنے لگیں۔خدشات اس وقت مزید بڑھ گئے جب شاہ رخ خان، سلمان خان، امیشا پٹیل، آریان خان اور رتیش دیشمکھ سمیت کئی بالی ووڈ شخصیات کو ممبئی کے بریچ کینڈی ہسپتال کے باہر دیکھا گیا، جس کے باعث مداحوں میں بے چینی پھیل گئی۔
تاہم بعد ازاں سنی دیول کی ٹیم کی جانب سے جاری کردہ ایک سرکاری بیان میں کہا گیا کہ مسٹر دھرمیندر کی حالت مستحکم ہے اور وہ زیرِ مشاہدہ ہیں۔ تمام سے گزارش ہے کہ ان کی صحت کے بارے میں غلط افواہیں پھیلانے سے گریز کریں۔
دھرمیندر کے انتقال سے متعلق جھوٹی پوسٹس میں بعض صارفین نے "End of an era" جیسے کیپشنز استعمال کیے، جس سے سوشل میڈیا پر مزید الجھن پھیل گئی۔اداکار کے اہلِ خانہ نے عوام سے اپیل کی ہے کہ وہ افواہوں پر یقین نہ کریں، فیملی کی پرائیویسی کا احترام کریں اور دھرمیندر کی جلد صحتیابی کے لیے دعا کریں۔