سٹی42: پنجاب اسمبلی کی قائمہ کمیٹی برائے داخلہ نے 16 سال سے کم عمر بچوں کو چھوٹی گاڑیاں چلانے کی اجازت دینے کی تجویز پیش کی ہے، جس کے تحت 660 سی سی سے 1000 سی سی تک کی چھوٹی گاڑی چلانے کے لیے 16 سالہ بچوں کو لائسنس جاری کرنے کی سفارش کی گئی ہے۔
پنجاب اسمبلی کی قائمہ کمیٹی برائے داخلہ نے 16 سالہ بچوں کو چھوٹی گاڑی کے لائسنس جاری کرنے کی تجویز اسمبلی اراکین کی جانب سے دی ہے۔ ذرائع کے مطابق یہ تجاویز حکومت کو پیش کی جائیں گی اور تجاویز کی روشنی میں صوبائی حکومت فیصلہ کرے گی۔
ذرائع کے مطابق بغیر لائسنس ڈرائیونگ کرنے والوں میں بڑی تعداد کالج و یونیورسٹی کے طلبہ کی پائی گئی تھی، جس کے باعث طلبہ کی گرفتاری اور دیگر مسائل سامنے آئے۔ اسی وجہ سے 16 سالہ بچوں کو موٹر سائیکل لائسنس دینے پر غور کیا گیا تھا۔
پنجاب موٹر گاڑیاں ترمیمی ایکٹ 2026 گزشتہ اجلاس میں اسمبلی سے منظور کیا گیا تھا، جسے قائمہ کمیٹی کے حوالے کیا گیا۔ اس ایکٹ میں 16 سال کی عمر ہو جانے پر موٹر سائیکل چلانے کی اجازت دی گئی ہے، جبکہ موٹر سائیکل چلانے کے لیے جووینائل ڈرائیونگ پرمٹ لازمی ہوگا۔
ترمیمی بل کے تحت صوبائی موٹر گاڑی آرڈیننس 1965 میں ترامیم کی جائیں گی اور ایکٹ کی حتمی منظوری گورنر پنجاب سردار سلیم حیدر دیں گے۔
چیف وہپ مسلم لیگ ن نے کہا کہ بغیر لائسنس ڈرائیونگ کرنے والے طلبہ کی بڑی تعداد تھی، جس کے باعث انہیں مسائل کا سامنا کرنا پڑا۔ اسی وجہ سے موٹر سائیکل کے بعد اراکین نے چھوٹی گاڑی کا لائسنس دینے کی تجویز دی ہے۔
رانا ارشد کے مطابق چھوٹی گاڑیوں کا لائسنس دینے کا مقصد طلبہ کو مشکلات سے بچانا اور انہیں تنگ نہ کرنا ہے۔