سٹی42: سرکاری ملازمین کو تنخواہیں عید سے پہلے ملیں گی۔ اس ضمن میں پہلا حکم نامہ آج جاری ہو گیا ہے۔

سندھ حکومت نے عید الفطر سے قبل تنخواہوں، پنشن اور الاؤنسز کی پیشگی ادائیگی کا اعلان کیا ہے، جس سے ملازمین کو تہوار سے قبل مالی ریلیف ملے گا۔

ایک سرکاری نوٹیفکیشن کے مطابق مارچ کی تنخواہیں یکم اپریل کی معمول کی تاریخ کے بجائے 21 مارچ کو ادا کی جائیں گی، اسی طرح پنشن اور الاؤنسز بھی 21 مارچ کو ادا کیے جائیں گے۔

سندھ کے سیکریٹری خزانہ فیاض جتوئی نے تمام صوبائی محکموں اور اداروں کو فیصلے پر عملدرآمد کی ہدایت جاری کردی ہے۔

اس اقدام کا مقصد سرکاری ملازمین اور پنشنرز کو سہولت فراہم کرنا ہے، جس سے وہ مالی رکاوٹوں کے بغیر عید الفطر کے لیے ضروری تیاری کر سکیں۔