ویب ڈیسک : اداکارہ مریم نفیس نے دعویٰ کیا ہے کہ لڑکے پر تشدد کرنے والی لڑکیوں کو پہلے ہراساں کیا گیا، انہیں طوائف جیسے الفاظ سے پکارا گیا جس کے بعد انہوں نے تنگ آکر لڑکے کو مارنا شروع کردیا۔
معروف اداکارہ مریم نفیس نے سوشل میڈیا پلیٹ فارم انسٹاگرام پر اسٹوریز لگائی جس میں انھوں نے دعویٰ کیا کہ لاہور کے پیٹرول پمپ کے اسٹور پر لڑکیوں نے ہراساں کرنے پر لڑکے کو تشدد کا نشانہ بنایا ہے۔لڑکیاں رات کے وقت وہاں چائے پینے اور کچھ چیزیں خریدنے گئیں تو انہیں بولڈ لباس میں دیکھ کر مذکورہ لڑکے نے ان کی جسامت اور کردار پر باتیں کرنا شروع کیں، ان کے مطابق لڑکے نے لڑکیوں کو دیکھ کر نہ صرف ان کی جسامت پر فکرے کسے بلکہ انہیں نہ صرف طوائف کہا بلکہ یہ بھی کہا کہ وہ رات کے وقت غلط کام کرنے نکلی ہیں۔
اداکارہ کا کہنا تھا کہ مذکورہ لڑکیوں نے پہلے لڑکے کو خاموش ہونے کا کہا لیکن باز نہ آنے پر انہوں نے آخری آپشن کے طور پر لڑکے کو مارنا شروع کیا، جس کے بعد لوگوں نے معاملے کو غلط رنگ دیا۔انہوں نے یہ بھی کہا کہ لڑکیوں کی جانب سے تشدد کیے جانے کے وقت وہاں ایک انکل آئے جنہوں نے واقعے کی ویڈیو بنانا شروع کی اور پھر واقعے کو غلط رنگ دیا گیا۔
اداکارہ کے مطابق لڑکے کو مارنے والی دو لڑکیوں کو وہ ذاتی طور پر جانتی ہیں، ان میں سے ایک لڑکی لاہور سے تعلق نہیں رکھتیں، وہ وہاں روزگار کے سلسلے میں رہتی ہیں جب کہ ان لڑکیوں کا کسی بااثر گھرانے سے کوئی تعلق نہیں اور نہ ہی کسی لڑکی کا والد کوئی بااثر وکیل ہے۔
اداکارہ مریم نفیس کی جانب سے سوال اٹھایا گیا کہ جب کوئی بھی مرد کسی بھی خاتون یا لڑکی کی چھاتی یا دیگر جسمانی اعضا پر بات کرے تو اس خاتون کے گھر والے کیا کریں گے؟ساتھ ہی انہوں نے اظہار برہمی کرتے ہوئے کہا کہ لاہور یا پاکستان اس قابل نہیں رہا کہ لڑکیاں رات کو مغربی لباس پہن کر چائے پینے یا کوئی چیز خریدنے نکلیں۔
خیال رہے کہ ایک روز قبل لاہور کے پیٹرول پمپ اسٹور پر لڑکیوں کی جانب سے لڑکے کو تشدد کا نشانہ بنانے کی ویڈیو ائرل ہوئی تھی، جس پر سوشل میڈیا صارفین نے اظہار برہمی کرتے ہوئے لڑکیوں کے خلاف قانونی کاررووائی کا مطالبہ کیا تھا۔