سٹی42: لاہور یونیورسٹی کی ایک طالبہ چھت سے گرنے کے بعد جنرل ہسپتال میں زیر علاج ہے، جہاں اس کی مسلسل نگرانی کے لیے میڈیکل بورڈ تشکیل دیا گیا ہے۔ پرنسپل پروفیسر فاروق افضل کی سربراہی میں بورڈ کے مطابق طالبہ کی حالت تشویشناک ہے تاہم دل کی دھڑکن اور بلڈ پریشر تسلی بخش ہیں۔

میڈیکل بورڈ کے رکن پروفیسر جودت سلیم کے مطابق طالبہ کے GCS (گلاسکو کوما اسکیل) میں بہتری دیکھی گئی ہے اور لیول 7 ریکارڈ کیا گیا ہے۔ مصنوعی سانس کی مشین ہٹانے کے لیے 'ویننگ ٹرائل' کا آغاز کر دیا گیا ہے۔ خون اور پلیٹ لیٹس کی ترسیل کے بعد رپورٹس نارمل آئیں، جبکہ پھیپھڑوں کی حالت میں بھی بہتری دیکھی گئی اور آکسیجن کی ضرورت کم ہو گئی ہے۔

میڈیکل بورڈ میں اب پروفیسر آف میڈیسن ڈاکٹر خرم سلیم، شعبہ پلمونالوجی کے سربراہ ڈاکٹر جاوید مگسی اور ایسوسی ایٹ پروفیسر گائنی ڈاکٹر سائرہ ذیشان بھی شامل ہیں، جن کی نگرانی میں سینئر ڈاکٹرز طالبہ کا علاج کر رہے ہیں۔