علی رامے:پنجاب حکومت نے صحت کارڈ پروگرام میں اہم تبدیلی کی منظوری دیتے ہوئے کینسر اور دل کے امراض کے علاج کو صحت کارڈ سے الگ کرنے کا فیصلہ کر لیا ہے۔
نئی پالیسی کے تحت اب ان مریضوں کا علاج صحت کارڈ کے بجائے وزیراعلیٰ کے خصوصی کارڈیک اور کینسر پروگرام کے ذریعے کیا جائے گا۔
حکومتی منصوبے کے مطابق وزیراعلیٰ کے مریضوں کے علاج کے لیے 13 ارب روپے جبکہ کارڈیک سرجری پروگرام کے لیے 3 ارب روپے مختص کیے گئے ہیں۔
اس طرح صرف کینسر اور دل کے مریضوں کے علاج پر مجموعی طور پر 16 ارب روپے خرچ کیے جائیں گے۔
ذرائع کے مطابق نئے پروگرام پر مکمل عملدرآمد کی ذمہ داری پنجاب ہیلتھ انیشی ایٹو مینجمنٹ کمپنی کے سپرد کر دی گئی ہے، جو کینسر اور دل کے مریضوں کے علاج کی نگرانی اور انتظامات کرے گی۔
حکومت کا کہنا ہے کہ آئندہ کینسر اور دل کے امراض میں مبتلا مریضوں کو علاج کی سہولت وزیراعلیٰ کے نئے خصوصی پروگرام کے تحت فراہم کی جائے گی۔