ویب ڈیسک: قومی مذاکراتی کمیٹی کی جانب سے قومی کانفرنس میں شرکت کی دعوت کے باوجود تحریک تحفظ آئین پاکستان نے کانفرنس میں شامل ہونے سے انکار کر دیا ہے.

تفصیلات کے مطابق نیشنل ڈائیلاگ کمیٹی نے تحریک تحفظ آئین پاکستان کی قیادت سے رابطہ کرتے ہوئے انہیں قومی کانفرنس میں شرکت کی دعوت دی، تاہم تحریک نے باضابطہ طور پر شرکت سے انکار کر دیا۔ ذرائع کا کہنا ہے کہ تحریک تحفظ آئین پاکستان کو دعوت نامہ آج موصول ہوا، جس کے بعد قیادت نے مشاورت کے بعد کانفرنس میں نہ جانے کا فیصلہ کیا۔

ذرائع کے مطابق بانی پی ٹی آئی کی جانب سے مذاکرات کا اختیار تحریک تحفظ آئین پاکستان کو دیا گیا ہے اور آئندہ کسی بھی قسم کے مذاکرات اسی پلیٹ فارم کے تحت کیے جائیں گے۔

یہ بھی بتایا گیا ہے کہ قومی مذاکراتی کمیٹی کی جانب سے منعقد کی جانے والی قومی کانفرنس 7 جنوری کو اسلام آباد میں ہوگی، جس میں ملک کی بڑی سیاسی جماعتوں کو مدعو کرنے کا فیصلہ کیا گیا ہے۔

ذرائع کے مطابق کانفرنس میں شرکت کے لیے پاکستان مسلم لیگ (ن)، پاکستان پیپلز پارٹی، پاکستان تحریک انصاف، جمعیت علمائے اسلام اور جماعت اسلامی کو دعوت دی جائے گی، جبکہ ایم کیو ایم پاکستان، ق لیگ، بلوچستان عوامی پارٹی، عوامی نیشنل پارٹی اور دیگر سیاسی جماعتوں کو بھی شرکت کی دعوت دی جائے گی۔