(عمران یونس) لاہوریئے استعمال شدہ گندا تیل استعمال کرنے سے بچ گئے، پنجاب فوڈ اتھارٹی نے 42 ڈرموں میں موجود 7 ہزار 560 لیٹر استعمال شدہ گندا تیل سپلائی کرنے کی کوشش ناکام بنا دی گئی۔

ڈی جی پنجاب فوڈ اتھارٹی کیپٹن (ر) محمد عثمان کی سربراہی میں فوڈ اتھارٹی نے رات گئے بڑی کارروائی  کرتے ہوئے 42 ڈرموں میں موجود 7 ہزار 560  لیٹرا ستعمال شدہ گندا تیل سپلائی کرنے کی کوشش ناکام بنا دی۔ استعمال شدہ تیل ٹرک نمبر ’’ٹی اے ایم 152 ‘‘میں انڈسٹریل ایریا روات، راولپنڈی سے لاہور لایا جا رہا تھا۔

ڈی جی فوڈ اتھارٹی کے مطابق ویجیلنس کی اطلاع پر ناکہ لگا کر ٹرک پکڑا، فوڈاتھارٹی ہیڈآفس لا کر تحقیقات شروع کر دی گئیں، کیپٹن (ر)محمد عثمان کے مطابق منظم گروہ بائیو ڈیزل کے نام پر تیل اکٹھا کر کے سستے داموں فیکٹریوں کو سپلائی کرتا تھا۔

پی ایف اے قوانین کے مطابق استعمال شدہ تیل کی صرف بائیو ڈیزل بنانے میں استعمال کی اجازت ہے، استعمال شدہ تیل کےکھانےمیں استعمال سے معدے کے السر اور کینسر جیسی موذی بیماریاں جنم لیتی ہیں۔