اسرار خان:نیشنل سائبر کرائم انویسٹیگیشن ایجنسی نے پی ٹی آئی رہنما ڈاکٹر شہباز گل کے خلاف مقدمہ درج کر لیا ، مقدمہ پنجاب پولیس کے انسپکٹر مظہر اقبال کی درخواست پر بیکا ایکٹ کے تحت درج کیا گیا ۔

مدعی مقدمہ نے ایف آئی آر میں مؤقف اختیار کیا ہے کہ ڈاکٹر شہباز گل نے اپنے یوٹیوب چینل اور ٹک ٹاک اکاؤنٹ پر اس کے خلاف ویڈیوز اپلوڈ کیں، ڈاکٹر شہباز گل نے ویڈیوز میں مدعی مقدمہ اور اسکے خاندان کے خلاف توہین آمیز اور نامناسب الفاظ استعمال کئے ۔

ایف آئی آر میں بتایا گیا ہے کہ ڈاکٹر شہباز گل نے اپنی ویڈیوز میں مدعی مقدمہ پر جھوٹے الزام لگائے اور غلط بیانی کی، ڈاکٹر شہباز گل کی اپلوڈ کی گئیں ویڈیوز مختلف لوگوں نے بھی اپنے چینلز پر اپلوڈ کیں ۔

پی ٹی آئی رہنما کی ویڈیوز کی وجہ سے مدعی مقدمہ اور اسکے خاندان کی ساکھ متاثر ہو رہی ہے۔دوسری جانب نیشنل سائبر کرائم انویسٹیگیشن ایجنسی نے مقدمے کی تفتیش سب انسپکٹر محسن رزاق کو سونپ دی ہے ۔