سٹی42: الیکشن ٹریبونل نے وفاقی وزیر عبدالعلیم خان کے حق میں بڑا فیصلہ سنا دیا ، ٹریبونل نے قومی اسمبلی کے حلقہ این اے 117 سے ان کی کامیابی کے خلاف دائر انتخابی عذرداری خارج کر دی۔
الیکشن ٹریبونل کے جج جسٹس سلطان تنویر احمد نے فیصلہ سناتے ہوئے عبدالعلیم خان کی کامیابی کا نوٹیفکیشن برقرار رکھا۔ انتخابی پٹیشن پی ٹی آئی کے حمایت یافتہ آزاد امیدوار علی اعجاز کی جانب سے دائر کی گئی تھی جس میں انہوں نے الیکشن نتائج کو چیلنج کیا تھا۔
عدالت نے دلائل سننے کے بعد علی اعجاز کی پٹیشن کو ناکافی شواہد کی بنیاد پر مسترد کر دیا اور کہا کہ انتخابی نتائج کو چیلنج کرنے کے لیے ٹھوس شواہد پیش نہیں کیے گئے۔
اس فیصلے کے بعد عبدالعلیم خان کی قومی اسمبلی کی نشست محفوظ ہو گئی ہے۔