(وسیم احمد) آئی سی سی ورلڈ ٹیسٹ چیمپئن شپ، پاکستان اور بنگلہ دیش کے درمیان ٹیسٹ سیریز کے پہلے میچ کیلئے ٹکٹوں کی فروخت کل سے شروع ہوگی۔
شائقین کرکٹ 7 سے 11 فروری تک پنڈی کرکٹ سٹیڈیم راولپنڈی میں ہونیوالے ٹیسٹ میچ کیلئے ٹکٹیں ٹی سی ایس کے ایکسپریس سنٹر سے خرید سکتے ہیں، شائقین کرکٹ ٹی سی ایس سنٹرز سے ٹکٹ خریدتے وقت قومی شناختی کارڈ اپنے ہمراہ رکھیں، ایک شناختی کارڈ پر زیادہ سے زیادہ 5 ٹکٹیں حاصل کی جاسکتی ہیں۔

پاکستان کرکٹ بورڈ نے شائقین کرکٹ کی سہولت اور دلچسپی کے پیش نظر ٹکٹوں کے نرخ کم رکھے ہیں جبکہ سات تا گیارہ فروری تک راولپنڈی میں شیڈول ٹیسٹ میچ کے لیے اظہر محمود، عمران خان، جاوید اختر اور جاوید میانداد انکلوژرز کے ٹکٹ کی قیمت 100 روپے مقرر کی گئی ہے۔ اس میچ کیلئے میران بخش، شعیب اختر، سہیل تنویر اور یاسر عرفات انکلوژرز کے ٹکٹ 50 روپے میں دستیاب ہوں گے۔