سٹی42: پنجاب پولیس میں افسران اور اہلکاروں کی ترقیوں کا عمل تیزی سے جاری، ایڈیشنل آئی جی پنجاب سلطان احمد چوہدری کی زیر صدارت پروموشن بورڈ کا اہم اجلاس ہوا جس میں انسپکٹر سے ڈی ایس پی رینک پر ترقی کے لیے تقریباً 300 کیسز کا جائزہ لیا گیا۔
اجلاس میں آئی جی پنجاب ڈاکٹر عثمان انور نے کہا کہ میرٹ، قواعد و ضوابط پر پورا اترنے والے انسپکٹرز کو ڈی ایس پی کے عہدے پر ترقی دی جائے گی۔
انہوں نے بتایا کہ گزشتہ دو برسوں کے دوران 500 سے زائد انسپکٹرز کو ڈی ایس پی کے عہدے پر ترقی دی جا چکی ہے۔اجلاس میں ڈی آئی جی ہیڈ کوارٹرز محمد عابد خان اور ڈی آئی جی اسٹیبلشمنٹ ون سلیمان سلطان رانا نے بھی شرکت کی۔
ترقیوں کا یہ عمل شفاف اور میرٹ کی بنیاد پر جاری رکھنے کا عزم کیا گیا ہے تاکہ پولیس فورس کو مؤثر اور متحرک بنایا جا سکے۔