ویب ڈیسک:نیویارک شہر کے پہلے مسلمان میئر ظہران ممدانی نے حلف اٹھانے کے بعد اپنی پہلی تقریر میں ایک نئے دور کے آغاز کا اعلان کرتے ہوئے کہا ہے کہ ایسے لمحات تاریخ میں کم ہی آتے ہیں جب حقیقی تبدیلی کا اختیار عوام کے ہاتھ میں ہو۔ انہوں نے اندرونِ مین ہٹن ہزاروں افراد سے خطاب کرتے ہوئے واضح کیا کہ وہ اپنی انتخابی مہم کے دوران کیے گئے وعدوں سے پیچھے نہیں ہٹیں گے اور شہر میں روزمرہ زندگی کی مہنگائی کم کرنے کے لیے عملی اقدامات کریں گے۔

ظہران ممدانی کا کہنا تھا کہ آج سے ان کی انتظامیہ پوری صلاحیت اور جرات کے ساتھ حکومت کرے گی۔ انہوں نے کہا کہ ممکن ہے ہر کوشش میں کامیابی نہ ملے، لیکن یہ الزام کبھی نہیں لگے گا کہ انہوں نے کوشش کرنے کی ہمت نہیں کی۔ انہوں نے اس عزم کا اعادہ کیا کہ وہ ایک جمہوری سوشلسٹ کے طور پر منتخب ہوئے ہیں اور اسی نظریے کے تحت حکومت کریں گے، چاہے انہیں اس وجہ سے تنقید یا مخالفت کا سامنا ہی کیوں نہ کرنا پڑے۔

اپنے خطاب کے اختتام پر میئر ظہران ممدانی نے کہا کہ اصل کام اب شروع ہوا ہے۔ حلف برداری کے چند گھنٹے بعد انہوں نے 26 ستمبر 2024 کے بعد جاری کیے گئے تمام ایگزیکٹو آرڈرز منسوخ کرنے کا اعلان کیا، جو سابق میئر کے دور میں وفاقی بدعنوانی کے الزامات کے تناظر میں جاری کیے گئے تھے۔

منسوخ کیے گئے احکامات میں وہ ہدایات بھی شامل تھیں جن کے تحت میئر کے عملے کو اسرائیل کے بائیکاٹ یا سرمایہ کاری سے اجتناب جیسے معاملات پر اظہارِ رائے سے روکا گیا تھا، جبکہ مذہبی آزادی اور عبادت گاہوں کے تحفظ سے متعلق اقدامات بھی محدود کر دیے گئے تھے۔

نئے میئر کے دفتر کے مطابق ان احکامات کی منسوخی کا مقصد نئی انتظامیہ کے لیے ایک صاف اور شفاف آغاز کو یقینی بنانا ہے، تاکہ ایسی پالیسیوں کو ازسرِ نو نافذ کیا جا سکے جو مسلسل عوامی خدمت، اصولی قیادت اور بنیادی اقدار کے فروغ کے لیے ضروری سمجھی جاتی ہیں۔